Cielo a scapa Aruba di presencia di Citgo durante Pandemia --- *Aruba mester atrae inversionista nobo cu no ta acepta peliger --- *DIARIO a adverti pa e situacion cu un Gobierno nobo pa Reino
ORANJESTAD (AAN) — 2019 a habri cu bista di mundo dirigi riba Nicolas Maduro, cu tabata prepara apertura di un satelite di poder nobo pa Rusia y Cuba dilanti costa di Aruba.
Na 2017, ora e plannan pa trece Citgo Aruba a fracasa, realmente cielo a scapa Aruba di presencia di Citgo di Nicolas Maduro durante e pandemia cu a manifesta su mes na inicio di 2020.
Na 2016 Maduro tabata biba cu e soño cu Aruba lo a bira e teritorio cu economicamente e tabata domina pa motibo di presencia di Citgo na Aruba.
Na 2017 e ilusion aki a rementa y Citgo a bira un fracaso den e catastrofe financiero di Aruba cu a exigi supervision di Reino Hulandes.
Cu Aruba a scapa di problema serio a bira realidad ora Rusia a presenta mundo e poder cu e tin riba Venezuela y tambe den Citgo cu pa 50 porciento ta di Rusia y 50 porciento di entidadnan financiero cu Venezuela of Citgo debe.
Cielo a permiti pa Maduro a keda pafo di Aruba, cu a recobra e yabinan di su refineria cu e Acuerdo cu Citgo a pone den man di Nicolas Maduro.
Na 2018 Nicolas Maduro contra reglanan democratico a bolbe subi trono di Venezuela, cu a duna inicio na e proceso cu lo a comberti Venezuela den satelite di Rusia cu a manda barconan e pais, caminda Cubano ta dicidi pa Venezolanonan.
E dolor di e poblacion di Venezuela a keda scondi ora e Coronavirus nobo a presenta y e problemanan den e relacion entre Aruba y Venezuela a bay perdi den e necesidad pa Aruba vence e atakenan di e coronavirus nobo.
Nicolas Maduro tabata e homber cu a cera frontera entre Aruba y Venezuela cu e pensamento cu Aruba lo a hinca rudia pa Venezuela, loke no a bira realidad.
Prome cu Covid-19 DIARIO a bati alarma pa e peligro pa Aruba for di momento cu Nicolas Maduro a tuma poder na e pais y a haci cu Venezolano mester a bandona nan pais na careda.
Refugiadonan cu Aruba no tin espacio ni placa pa asisti, a cuminsa yega Aruba na cantidad. E salida na careda di ciudadanonan di buena fe di Venezuela, a habri oportunidad pa Nicolas Maduro haya gruponan pa infiltra y drenta Aruba cu semper el a considera parti di Venezuela.
Defensa Hulanda ta na haltura. Hulanda a hunga un papel excepcional dor di rechasa oficialmente Nicolas Maduro como presidente di Venezuela pero na mes momento bay atende cu Nicolas Maduro riba tereno economico.
Na e momentonan aki, Aruba no por tuma ningun riesgo. DIARIO a mustra for di entrada di e gobierno nobo, cu Aruba por a spera accion riba e tereno aki.
DIARIO a papia di e maneho Hulandes cu a cambia di titular. Den e documento cu e Ministro di Relacionnan di Exterior di Reino a ricibi di man di e Ministro cu a baha, e relacion Aruba y Venezuela a wordo atende.
Aruba mester mantene su punto di bista. No ta conoci kico a pasa na Venezuela ora e pais a perde atencion dor di Covid-19.
Frontera cu Venezuela mester keda cera pa proteha Aruba cu mester a fortifica su defensa mientras interes Ruso y Cubano ta aumenta na Venezuela, dirigi pa Nicolas Maduro cu ta wordo busca pa autoridad internacional.
Interes di Aruba mester keda na prome lugar sigur den e proceso cu Aruba mester atrae inversionista nobo cu lo no acepta riesgo halto na Aruba!
Frontera mester keda cera, mientras Aruba ta sigui traha riba solucion pa problemanan di Aruba y di Arubianonan den un crisis mundial.
