Edad di hende lo sigui subi cu exigencia financiero awor impagabel --- *Realidad mundial ta pio cu recesion causa pa aumento di prijs --- *Comercio mundial no por sostene gobernacionnan cu no adapta
ORANJESTAD (AAN) — Ora papia di e situacion mundial, ta papia di un situacion cu a bandona orbita di normalidad.
Ningun experto na mundo por bisa kico ta socede exactamente den un situacion cu a rementa den man di hende.
Paso a paso pero sigur, e analisisnan y produccionnan periodistico di DIARIO, ta entrega prueba cu nan tabata y ta basa riba berdad, aunke Aruba na e momento aki no ta sinti e peso cu hopi pais na mundo conoce y por impacta Aruba cu ta depende di exterior, manera semper nos a trece dilanti.
Turismo a subi na Aruba a base di e hopi bon trabou cu Gobierno Wever-Croes a realisa.
Gobierno Wever-Croes claramente, manera cifranan ta indica, a hiba un maneho cu a haci cu Aruba, a sigui atrae turismo y a sigui presenta e imagen mas halto cu por tin na un pais democratico.
Continuamente a mantene Aruba na un forma positivo den noticia internacional loke a haci cu personanan cu ainda por biaha, ainda por saca placa sin mira kico ta come e siguiente dia, a bishita Aruba como turista y a sostene economia.
Pero, nos mester ta sumamente realista.
Aruba mescos cu henter mundo ta enfrenta un epoca, den cual tur planificacion di hende ta rementa den man di hende.
A planifica famia y e cantidad di mucha cu a nace a baha considerablemente. Menos gasto pa mayornan pasobra ta menos boca tabata tin den cas pa come.
Na añanan setenta famia chikito tabata asina importante pa planificacion cu hasta Nacionnan Uni a lansa Sterelisacion Internacional como proyecto pa cantidad di pais.
E grupo grandi di mayornan cu no tabata kier gasto di hopi yiu, awe ta gasto pa un comunidad. Un cantidad grandi di hende cu awe mester a pone placa riba mesa pa comunidad funciona, nunca a nace pasobra nan a wordo preveni of hasta aborta.
Uno di e problemanan mas grandi na mundo ta esaki. Mundo no por mantene su pakete di beneficionan social pasobra no tin suficiente hende pa paga.
E generacion cu a introduci planificacion familiar, tabata e generacion mas rico den historia moderno di paisnan civilisa.
Awe henter un mundo cu a basa su mes riba gasta y sigui gasta placa, ta basha abou. Sinembargo, si bay atras den historia por mira cu Siglo 20 a cera cu problemanan serio riba tereno financiero y monetario internacional.
Aruba mescos cu tur parti di mundo a drenta Siglo 21 cu exigencia pa mas belasting, gobernacion di austeridad.
Aruba su problema ta, cu Gobierno Mike Eman a deshaci di parti di entrada di Aruba, na momento cu tur pais na mundo tabata trata di atende cu responsabilidad cu placa.
E debenan cu Gobierno Mike Eman a crea pa Aruba den un situacion mundial delicada, hunto cu e debenan pa paga durante 30 aña pa proyectonan PPS, a haci cu Aruba a keda sin placa pa futuro ora Covid-19 a destrui hende y economia mundial.
Na 2021 ora a dicidi cu mester splica companianan internacional cu clima tin mas importancia cu placa di petroleo, DIARIO a adverti pa e impacto cu esaki lo tabata tin riba economia mundial.
Rusia cu porfin a splica mundo cu e ta e potentado mas grandi di petroleo na mundo, a dicidi cu e ta invadi Ukraine.
Awe mundo ta pasa den un situacion economico mundial, cu ta pio cu cualkier hende lo a spera.
Comercio internacional solamente por produci loke hende mester pa su bida diario, si gobernacion tuma medidanan y adapta su mes na e reglanan cu cual un comerciante tambe mester cumpli.
Mester reforma Aruba cu Hulanda a scapa di estado oficial di bancarota na 2014.
E fantasia di Gobierno Mike Eman, ta prueba di loke ta pasa cu politica barata y realmente corupto.
Pasobra si bo sa cu no tin placa y bo ta gasta placa cu no ta bo mes, ta nifica cu bo ta bay prison.
Alexandra van Huffelen a bira Ministro Hulandes di Relacionnan den Reino na un momento, cu Aruba mester di su conocemento y capacidad pa sigui cana.
No ta trata di un politico sin mas. El a sigui e Vakopleiding Openbare Financien voor hogere ambtenaren.
El a studia Bestuurskunde y ta prepara pa dirigi un pais.
Otro siman, Aruba ta den realidad di bida ta den problema serio, mester duna e experto aki un oportunidad, pa cambia rumbo di Aruba.
Mundo ta pasa den uno di su situacionnan mas dificil den historia moderno. Aruba como un isla chikito, mester acepta yudansa y guia pa yega na un futuro nobo.
