Comerciante Francis Saladin:
*Entre otro di Caribe, Centroamerica, Turkia, por ehemplo
ORANJESTAD (AAN) – Rond mundo tur producto a bira caro y vooral na Merca por wak cu, tur cos, ta hopi caro. Asina e comerciante Francis Saladin a menciona den entrevista cu DIARIO.
Pero e Mericanonan tambe ta keha cu prijs na Merca ta mas caro, pero ora nan ta bay supermercado na Aruba nan ta paga mas cu loke nan ta custumbra di paga den nan pais.
“Pero locual nos ta purba di haci aworaki, ta purba di cambia e mentalidad di e Arubianonan, pa cuminza cumpra y consumi producto di otro paisnan. Nos ta wak den Caribe, den Centroamerica, y te mas leu den otro paisnan manera Asia, Turkia, cu ta camindanan unda ainda por haya cuminda mas barata. Pero e Arubiano mester acepta, mester ta habri pa adapta”, Saladin a indica.
El a reitera cu di Merca, y tur loke ta bin di Europa, Hulanda, ta hopi caro, pero si nos ta mente abierto, y como Isla tambe ta acepta mas, otro productonan, esey lo bay alivia e costo di bida.
“Pero claro, riba e aspecto aki, e transporte hopi biaha ta keda e reto. Hendenan ta lubida cu nos ta un Isla chikito, nan no tin hopi barco ta bin. Dus, nos ta limita tambe door di transporte, ya cu nos t’asina chikito esey ta limita nos tambe, y tin biaha ta hacie mas dificil, pa trece productonan di otro paisnan na unda por ta, e prijsnan ta hopi miho” Saladin a señala.
Saladin a comenta cu den e siman cu a pasa e tabata na un recepcion cu Presidente di Surinam, un pais cu kier haci mas negoshi cu Aruba y tin oportunidadnan, y e ta kere cu asina Aruba mester crea lazonan cu tur otro pais cu tin productonan, comestible, mas barata pa ofrece nos Isla.
