ORANJESTAD (AAN): Pronto Aruba Marriott Resort & Stellaris Casino hunto cu The Ritz Carlton, Aruba lo tene e prome “Virtual Job Fair”,
cu ta tuma luga diamars awo, dia 26 maart, cuminsando for di 10:00 am te cu 4:00 pm. Cu esaki e dos hotelnan ta uni forsa pa por acerca e mercado laboral di un forma mas moderno, pa haya hende di Aruba y for di exterior, pa solicita pa un trabou na un di e hotelnan. Ta conoci cu tin un scarsedad grandi di trahado y como tal awo ta purba di tur forma pa haya mas hende solicita pa por yena e funcionnan cu awor ta habri.
Arantxa Sanchez, Human Resources Coordinator na The Ritz Carlton, Aruba, a comenta cu un “Virtual Job Fair” ta un feria di trabou “online” pues completamente virtual. Cu un “Virtual Job Fair”, e solicitante por aplica for di e comodidad di su hogar of te hasta si e ta riba vakantie na un otro pais. Departamento di Recurso Humano, como tambe e demas departamentonan concerni, lo ta cla pa asisti cu cualkier pregunta.
Jason Zeng, Human Resources Manager na Aruba Marriott Resort & Stellaris Casino, a splica cu pa registra ta masha facil. Djis subi e website arubamarriotthotels.vfairs.com y despues cu e pagina habri mester primi riba “register” y registra cu un e-mail valido. Asina cu keda cla cu registracion lo haya un e-mail pa atende e “Virtual Job Fair”.
E “Virtual Job Fair” lo ta mescos cu un “job fair” normal. Na momento cu e persona registra online, pues via internet, e lo drenta den e lobby caminda lo mira tur booth di The Ritz Carlton, Aruba y di Aruba Marriott Resort & Stellaris Casino. Diferente departamento y lider lo ta online den e “Virtual Job Fair” pa contesta cualkier pregunta riba cualkier posicion disponibel den ambos hotel.
Ta bon pa menciona cu e dos hotelnan aki ta entre esunnan di mas grandi y prestigioso di Aruba. Ambos ta forma parti di e red di Marriott mes, den cual e huespednan, mayoria di e mesun marca aki, ta bishita nan unda cu nan biaha na mundo. Pues nan mesun red di miembresia ta un di esunnan di mas grandi na mundo. E dos hotelnan hunto tin mas di 100 cupo di trabou habri y como tal ta den necesidad pa por haya mas trahado.
Tanto Aruba Marriott Resort & Stellaris Casino como tambe The Ritz Carlton, Aruba ta conoci pa tin bon pakete di beneficio secundario pa tur trahado, banda di un salario competitivo. Un di e beneficionan di mas atractivo ta e descuento cu tur empleado ta ricibi ora cu nan biaha y keda na cualkier hotel di Marriott rond di mundo.
Aruba Marriott Resort & Stellaris Casino hunto cu The Ritz Carlton, Aruba ta invita henter comunidad di Aruba pa registra y uni n’e prome “Virtual Job Fair”. No lubida, por join e “Virtual Job Fair” for di unda cu bo ta!
