Rubin Ponson ta informa:
*E meta ta pa recauda fondo pa sigui yuda comunidad
ORANJESTAD (AAN) – Manera ta conoci Aruba Lions Club tin proyectonan andando durante henter aña, segun Rubin Ponson a menciona den entrevista cu DIARIO.
Nan tin diferente proyecto conoci manera Hospital Bed, Wheelchair, nan Health Fair, den comunidad y otro diferente proyecto. “Y tur esakinan mester di fondo pa por logra nan y yuda comunidad. Nos ta bay tin un 'Night Car Rally' combina cu Scavenger Hunt, cu ta bira nos actividad pa recauda fondo”, Ponson a duna di conoce.
E Car Rally aki ta bay tuma lugar diasabra 28 di September awo, cuminzando anochi 7’or te 11’or, for di Club di Aruba Lions Club na Engelandstraat, cu ta dilanti Tennis bieu. “Bo ta bin den bo auto cu maximo 5 persona y minimo dos persona den dje”, el a informa. Awendia, como tur cos a bira moderno, e opdrachtnan ta wordo pasa via celular. “Kiermen tur hende mester tin un celular cu ne conecta via What’s app. Logicamente, bo data mester ta bon y bo mester ta comunicable den henter e trayectoria di e car rally”, Ponson a indica. Por inscribi for di aworaki via e website unda bo ta haya un link pa inscripcion y haci pago, of diasabra mes por yega na e club, inscribi, paga y sali cu bo auto.
E car rally lo dura entre dos pa dos ora y mey, y nan ta premira cu pa 11’or e actividad lo a caba entregando premio. Un di e premionan ta bay ta 500 florin cash pa e ganador y banda di dje tin diferente otro premionan pa e autonan participante.
E car rally ta cuminza na Aruba Lions club mes na Eagle. E ta bay pasa den e cayanan di Oranjestad ta bay te den Noord, ta tuma full e bario di Noord bin bek Oranjestad.
Rubin Ponson ta haci un yamada na comunidad pa bin cu famia den auto, amigonan, coleganan, etc., y bin participa. “Participando sigur, bo ta contribuyendo tambe pa nos por sigui yuda comunidad cu esaki”, Ponson a menciona.
