ORANJESTAD (AAN): Despues di un exitoso Feria di Salud na San Nicolas, ta toca turno pa e bario di Oranjestad y vecindario.
Aruba Lions Club den colaboracion cu Xavier University, Mary Joan Foundation, Fundacion ABO, Aruba Vision Center, Quota, Fepoh y Smile Mobile hunto ta presenta Feria di Salud pa e bario di Oranjestad y vecindario.
Lo tin oportunidad pa check colesterol, presion di sanger, sucu, oido, control di presion di wowo, control di pecho / tripa y limpieza di dentadura falso (protesis dental).
Ta extende un invitacion na un y tur pa presenta nan mes Diasabra, 13 di Juni na Xavier University, entre 8'or am pa 12'or pm. No mester di haci cita y tur checkup ta gratis.
Bin controla bo peso, sucu, presion di sanger, presion di bista, oido, pecho, dentadura y cholesterol.
Aruba Lions Club ta bin ta haciendo esaki caba pa varios aña como e salud di nos pueblo mester ta un prioridad pa nos tur. Nan ta warda comunidad sin falta, Diasabra 13 di Juni for di 8'or mainta te cu 12’or di merdia, na Xavier University situa na Santa Helenastraat 23.
