Caso contra Benny Sevinger lo exigi control severo di politiconan --- *Reputacion mundial di Aruba na disputa den sala di Corte --- *Diezun acusado dilanti Mesa Berde ta exigi cambio di leynan
ORANJESTAD (AAN) — Na momento cu dia 7 di Februari un cantidad di 11 acusado presenta dilanti Mesa Berde, reputacion mundial di Aruba lo ta na disputa den sala di Corte di Husticia.
Pa comprende loke realmente lo tuma lugar den Corte di Husticia, mester bay na e base legal di representacion di Pueblo den Gobierno y den Parlamento caminda politiconan directamente ta papia na nomber di Aruba.
Na momento cu un Ministro firma un decision of Parlamento di Aruba dicidi riba un asunto, Pais Aruba a dicidi y Pais Aruba a haci of deshaci.
Na momento cu Pueblo bay Urna electoral e ta dicidi pa personanan cu mester goberna na su nomber. Esaki tin un nificacion mucho mas grandi cu demasiado desaroyo politico ta haci hende pensa.
Un politico cu Pueblo pone den un funcion den Parlamento, no ta papia mas pa su mes.
Na momento cu un Miembro di Parlamento papia y tuma decision, na momento cu un gobernante actua, e ta haci esaki na Nomber di Pueblo di Aruba cu ta wordo mara na su decisionnan.
Dialuna 7 di Februari 2022 lo ta un dia historico ya cu riba e fecha aki, Huez lo dicidi con ta bay atende e caso Avestruz den cual Benny Sevinger como Ministro den Gobierno Mike Eman, mester responde acusacionnan sumamente serio.
Den e grupo di acusado Benny Sevinger ta e persona central pa mas cu un motibo.
E acusacion mas importante ta, cu contra ley cierto accionnan lo a tuma lugar.
Pa tur e acusacionnan aki por tabata realidad, tabata tin mester un persona, cu autoridad cu Pueblo a entrega su Pueblo, pa a tuma decisionnan, cu awe ta base pa un lista di crimen cu Ministerio Publico ta presenta.
Aki nos ta papia di un lista sumamente serio di crimen manera falsificacion, estafa, labamento di placa di cual Benny Sevinger ta wordo acusa.
Benny den esaki no tabata dicidi pa su negoshi pero pa Aruba, cu directamente el a representa como Ministro.
Na momento cu un Ministro mara Aruba, el a mara e pais a menos cu ta trata di casonan den cual e Ministro mester di autorizacion di Parlamento.
Ora papia di un Ministro ta tene na consideracion cu ta trata di un persona cu a wordo nombra pa representa y papia, dicidi, na nomber di e pais.
Dialuna pues un sistema politico di Aruba lo ta dilanti Huez atrobe. Mester uza e palabra “atrobe” a base di e caso historico di Fondo Desaroyo Nobo San Nicolas cu a hiba cuatro Ministro di Gobierno Henny Eman dilanti Huez.
Den e caso di Benny Sevinger e asunto aki ta mas serio pasobra partido AVP a uza voto di Pueblo pa percura pa un acusado di Husticia representa Pueblo di Aruba, loke ta nifica cu Benny Sevinger ta cara y voz oficial di Aruba.
Siman nobo lo habri pues cu un caso cu por exigi pa medidanan mucho mas severo wordo tuma pa loke ta trata representacion di Pueblo, cu ta habri porta pa politiconan di mal comportacion, tira nomber y reputacion di Aruba directamente den lodo!
