Expertonan ta cuestiona responsabilidad individual den accion anuncia
ORANJESTAD (AAN)- Un mayoria pronuncia na Aruba, cu ta inclui empleado publico tambe, ta sumamente preocupa pa e rumbo cu na vispera di dianan di fiesta Aruba a drenta.
Ayeramerdia e preocupacion a bira mas grandi despues cu e informacionnan sindical no tabata indica, kende ta e figura central responsabel den accionnan cu ta wordo planea pa Diaranzon mientras for di ayera por a nota mobolisacion na varios lugar.
Informantenan di DIARIO a indica, cu sindicalismo ta crea un situacion sumamente peligroso pa Aruba na momento cu nan no ta presenta un dirigente pa ehecucion di e plannan cu nan ta presenta.
E indicacion cu sindicatonan a duna te cu ayera prome cu a cera e edicion aki di DIARIO, ta, cu cada sindicato ta tene su accion, loke ta haci cu Aruba lo conoce accionnan plama pero tambe diferente dirigente.
“Kende ta responsabel pa kico?” ta e informacionnan cu a bini dilanti na DIARIO.
Den e caso aki e sindicato cu ta envolvi den e combersacionnan laboral cu a tranca, ta sindicatonan di Gobierno.
Pero na mes momento ta papia di accion nacional loke ta nifica cu sindicatonan cu no tin problema cu empresanan caminda nan ta traha, tambe lo participa.
“Ta papia aki di un accion nacional pero tambe di un wild strike, cu ta sumamente peligroso pa e pais,” informantenan clave a trece dilanti.
Nan a puntra cual ta e figura central cu ta dirigi cual accion pa cual sindicatonan ta responsabel.
Cada persona cu uni hende pa manifesta, pa accion, ta responsabel pa comportacion di e grupo y tur loke por pasa.
Kende ta responsabel pa tur loke por pasa, ta e pregunta grandi di informantenan cu ta papia di tur e peligernan cu wild strike conoce.
Den edicion di awe, DIARIO ta atende cu e situacion serio cu a presenta na Aruba den un situacion mundial sumamente delicado. Mas importante ta sinembargo, cu e forma cu a decreta accion, ta duna indicacion cu cada sindicato por haci loke e kier, den su seno.
Segun informantenan clave, awe sindicatonan mester anuncia kende ta nan dirigente central y kende ta asumi responsabilidad pa cada accion y resultado di e accion.
E seguridad nacional di Aruba ta bini na prome lugar, manera expertonan ta indica y si cada grupo ta drenta accion riba nan mes, seguridad nacional sigur ta na wega.
