Como “Best Convention & Visitors Bureau”
ORANJESTAD (AAN): Aruba Convention Bureau (ACB), bou di encargo di Aruba Tourism Authority (A.T.A.) orguyosamente ta logra premiacion di ‘Best CVB/DMO International’, esta ‘Best Convention & Visitors Bureau y Destination Management Organization’ na Smart Stars Awards 2024, organiza pa Smart Meetings Magazine.
E reconocemento prestigioso aki ta subraya e compromiso constante di Aruba Convention Bureau (ACB) pa promove Aruba como un destinacion atractivo pa reunion, biahe incentivo, conferencia, y exibicion (MICE).
Smart Meetings, un publicador lider di e industria di reunion, y e boz di inspiracion pa profesionalnan den e industria, anualmente ta invita socionan den e industria pa nomina y cumpli cu voto riba experiencia propio cu un Convention Bureau. Ta un honor di por anuncia oficialmente cu ACB ta worde selecciona como e ganador absoluto di ‘Smart Stars Awards 2024’. Un resultado cu sigur a trece cu’ne un gran orguyo pa e ekipo di ACB.
E reconocemento aki ta un testimonio di e dedicacion, pasion, y trabao duru estableci pa e team di ACB. E ta trece un gran satisfaccion pa mira cu e esfuerso pa promove Aruba, y e compromiso pa sigui mehora continuamente, ta worde reconoci internacionalmente. Un logro cu ta refleha e espirito di e ekipo di ACB pa continua na expande e conocemento, comparti, y celebra tur logro.
Banda di e premiacion aki, Aruba ta logra conkista dos otro premio prestigioso di Smart Meetings: (1) Aruba Marriott Resort & Stellaris Casino a worde nombra como e "Best Beach Hotel." (2) Hilton Aruba Caribbean Resort & Casino a worde premia como "Best Incentive Hotel."
A.T.A. ta sumamente orguyoso di su ekipo di ACB, y ta felicita Aruba Marriott Resort & Stellaris Casino y Hilton Aruba Caribbean Resort & Casino cu e premiacion. E logronan aki ta continua na posiciona Aruba como un destinacion atractivo pa biahe personal, como pa negoshi.
