Problemanan na nivel internacional por afecta esfuerzo local --- *Inflacion ta afecta Merca y paisnan Europeo na forma severo --- *Menasa creciente di guera tin influencia riba sector di turismo
ORANJESTAD(AAN)—Aruba ta drenta un fin di siman cu mester wordo cualifica como sumamente dificil pa henter mundo.
Ayera, preparando e edicion di awe, te na ultimo momento DIARIO tabata pendiente di tur desaroyo cu por tin resultado no solamente pa poblacion di Aruba pero tambe pa personanan cu ta planea un biahe pa exterior.
E hecho cu na e parti Occidental di mundo, pues na Merca entre otro e cantidad di casonan di Omicron a cuminsa baha, ta crea expectativanan di regreso na normal.
E desaroyonan na Ukraine sinembargo, no ta permiti mundo papia di un normalidad cu sigur ta bini dilanti den informacionnan di entre otro e Bolsanan di Balor cu a conoce momentonan dificil ayera.
Mientras stabilidad na mundo tabata baha cada rato, peliger pa turismo mundialmente a sigui subi.
Uno di e peligernan mayor pa turismo ta keda e prijs di turismo, cu no ta solamente e prijs pa un persona keda na un hotel, pero ta inclui e prijsnan cu e mester paga pa biaha cu atrobe ta wordo afecta pa diferente asunto.
E placa cu un persona mester pa biaha ta wordo defini dor di e prijs cu ta wordo cobra dor di tur instancia envolvi den biahe pero tambe dor di e placa cu un persona tin disponibel pa biaha ora e atende cu su otro gastonan.
Esaki ta haci cu mester atende cu turismo na diferente nivel di entrada.
E turista cu no ta mara na un limite di placa pa e realisa su biahe, lo por paga mas si prijs subi.
E mayoria grandi di turista, cu no a regla su vacacion di antemano por ehempel, awe ta wordo confronta cu prijsnan cu ta subi.
Na mes momento mester tene consideracion cu e gastonan di bida normal ta sigui subi dor di sigur e prijs di petroleo.
E condicionnan di tempo na Merca, cu ta produci cantidad di turista pa Aruba, y tambe na Europa, ta exigi mas placa.
Ora nos papia di Merca sigur mester tene cuenta cu e situacion na e partinan di Merca cu ta produci mas turista pero cu na e momentonan aki ta wordo confronta cu gastonan mas halto.
Ademas di e gasto pa biaha, e seguridad mundial ta afecta turismo. E tension mundial creciente ta afecta biahe cu ainda no a wordo regla y por pospone.
E recuperacion di Aruba ta tuma lugar na un momento dificil pa henter mundo, cu ta registra uno di e posibilidadnan mas grandi di guera, cu tanto mundo a teme y a trata di preveni .
Inflacion despues di Covid-19 cu ainda por soprende mundo, lo dura mas cu a pensa dor di e situacion actual di guera.
DIARIO ta sigui tur desaroyo na tur parti di mundo pa informa Aruba den un situacion mundial cu a sorprende y cu ta exigi mas cu nunca trankilidad na Aruba.
Trankilidad pa e Pueblo di Aruba cu mester sigui cana pa un futuro cu cada rato tin mas reto, pero trankilidad sigur pa tur bishitante cu ta uza vacacion pa lubida cu problema ta existi y sigur no kier mas problema ora nan bay cu vacacion.
