Mas pashent manda Colombia - Diestres persona interna den un solo dia - Salba bo mes! Suplica urgente pa Diadomingo bay vacuna!
ORANJESTAD (AAN): Riba Diabierna ta den casi tur distrito por a tende sirena di Ambulans ta move! Indicacion cu ta mas hende a sigui bira malo debi na e brote di Covid-19 causa pa e variante agresivo di Delta, cu ta ataca tur hende.
Situacion ainda ta parce hopi scur pa loke ta trata Covid-19 na Aruba, promedio di caso pa dia ta den un promedio di 99 caso.
Segun resumen di DVG suministra riba Diabierna, un total di 118 caso nobo a wordo registra cu Covid-19, di cual 109 ta hende local, y 9 ta turista.
E cifranan aki ta representa un 'Positivity rate' bao di nos hendenan local di 27%.
Cantidad di casonan activo di COVID-19 aworaki ta 1.055. Esnan cu no ta den Hospital, ta den isolacion na cas.
E cantidad di fayecidonan relaciona cu COVID-19 ta 124. Riba Diahuebs a raporta un turista cu a fayece, pero esaki a worde coregi pa motibo cu tabata trata di un persona local. Ademas di esey 154 persona a recupera.
Datonan di COVID ta ilustra subida di casonan nobo y un average di 'positivity rate' semanal di 26% pa dia.
Tin actualmente 83 persona interna cu COVID di cual 9 ta den ICU na Aruba, 14 den ICU na Colombia, 56 riba piso general, 2 riba piso di maternidad y 1 mucha riba pediatria, si ta compara cu un dia prome, Hospital a registra 70 persona interna cu COVID, cu 8 tabata den ICU na Aruba, 13 den ICU na Colombia, 47 riba piso general y 2 riba piso di maternidad.
