Minister di Finanzas Xiomara Maduro:
ORANJESTAD (AAN) – Dialuna a tuma lugar e conferencia di prensa di Gobierno, cu participacion di Minister di Finanzas y Cultura, Xiomara Maduro.
E tema central cu e mandatario a trata e dia aki, ta e hecho cu Aruba ta subi e mercado internacional di capital, na un manera exitoso. El a mustra cifra di locual ta e debe di Pais Aruba, cual ta bahando na un forma basta lihe.
MERCADO DI CAPITAL:
Minister Xiomara Maduro a splica cu Aruba ta subi e mercado internacional di capital y esaki ta necesario p’asina por cubri loke ta e necesidad financiero, cu tin den presupuesto 2024.
“Mester bisa cu nos a logra di a cera un fianza 134.5 miyon dollar na un interes di 6.3%. Manera a indica, esaki ta pa nos cubri e necesidad financiero den presupuesto 2024, y tambe pa por paga debenan cu ta madura (bebe bieu) na aña 2024”, Minister Xiomara Maduro a señala.
E mandatario a agrega cu interesante pa sa ta, cu e ultimo biaha cu Aruba a presta placa riba mercado internacional di capital, tabata na aña 2018. “Y esaki ta pa motibo cu nos a sigui un strategia na unda cu desde comienzo caba, nos a refinancia e debenan di Aruba cu ta madura riba e mercado local p’asina nos cuminza baha, locual ta e peso di e debe externo na Pais Aruba”, e dignatario a indica.
Minister Maduro a splica cu nan a sigui asina na 2019; e mercado local tabata tin espacio pa e parti aki y, despues, na 2020 a logra atrobe pa cera pa cumpli cu tur e debedornan, pero despues e pandemia a drenta y a debilita e finanzas publico di Pais Aruba, grandemente.
“Y p’esey den e añanan di pandemia, 2021-2022, nos a mira e ora ey cu Hulanda a brinda Aruba un fianza p’asina nos por a paga e debenan externo di Pais Aruba, y di e manera ey Aruba ta keda wanta un bon reputacion, cerca inversionistanan”, Minister di Finanzas a remarca.
E dignatario a sigui bisa cu djey pa aña 2023 a bay bek pa e mercado local cu tabata suficientemente likido, pa cu esaki y tabata tin apetit tambe pa e parti eynan, y gobierno a prepara su mes pa por subi e mercado internacional.
“Na 2023 ainda, e condicionnan no tabata faborable pa Aruba y p’esey nos a dirigi na e mercado local, pero despues di tur esaki, dus 2018 tabata e ultimo aña cu nos a bay mercado internacional; nos a haci tur preparacion, pa e aña aki nos a haya subi na e mercado internacional di capital, y esaki tabata hopi exitoso. Y exitoso tambe pasobra nos a haya un interes cu ta hopi bon pa cu Aruba”, Minister di Finanzas Xiomara Maduro a reitera.
{gallery}Aruba a subi mercado internacional di capital na un manera hopi exitoso, na un interes di 6porciento{/gallery}
