Minister Dangui Oduber: --- ORANJESTAD (AAN): Recuperacion di Aruba su turismo ta importante, paso turismo ta e motor principal di Aruba su economia.
Segun datonan ricibi for di ATA, Aruba a recupera 88% di turismo den luna di October 2021 compara cu October 2019.
E mercado americano a recupera cu 94% den luna di October 2021, compara cu oktober 2019. E recuperacion di e mercado americano ta uno hopi fuerte y danki na esaki nos ta mira con economia tambe ta creciendo.
E recuperacion aki ta bayendo mihor cu locual a wordo proyecta na comienso di aña.
Segun proyeccion nan ricibi for di ATA, aña 2022 ta mustra positivo pa Aruba su turismo. Si nos sigui ariba e bon caminda aki, nos lo surpasa e 100% recuperacion den comparacion cu aña 2019. Aña 2019 ta keda wordo usa como referencia, door cu e tabata un di e aña nan mas mihor den historia di Aruba su turismo.
No obstante tur e retonan, specialmente e pandemia di Covid19, nos isla a sa di recupera hopi lihe, haciendo Aruba e isla den Caribe cu ta recuperando mas lihe. Pesey Aruba por ta orguyoso, paso recuperacion di nos turismo lo juda Aruba su economia, incluyendo e creacion di mas cupo nan di trabou.
Mester sigui enfatisa cu e logro di Aruba su recuperacion ta di gradici na esfuerzo nan conhunto di Ministerio di Turismo y partners manera ATA, AAA, APA & AHATA.
Minister Dangui Oduber ta satisfecho y tambe optimista di con turismo lo sigui progresa.
