ORANJESTAD (AAN): Prome Minister Evelyn Wever-Croes conhuntamente cu Minister Plenipotenciario Ady Thijsen a ricibi sr. Nico van der Ven na Arubahuis,
kende ta un fotografo cu desde aña 1968 ta asistiendo Aruba, Antiyas y diferente lider politico di Aruba na Hulanda, pa brinde un reconocemento.
Sr. van der Ven ta un gran fotografo kende semper a yuda gobernantenan di Aruba cu tabata na Hulanda y e tin hopi recuerdo bunita di Aruba.
Prome Minister a splica cu e conoce sr. van der Ven desde inicio di su careea politico y sr. van der Ven ta un persona cu semper tabata dispuesto pa yuda.
E siman aki a invita sr. van der Ven na Arubahuis pa dune un reconocemento pa e gratitud cu ta sinti pe como Aruba y representante di Aruba, pa e trabao grandi cu el a haci na Hulanda semper.
Den e combersacion sr. van der Ven a conta algun anecdota, y un di nan cu a hala atencion di Prome Minister Wever-Croes ta ora cu el a encontra cu sr. Betico Croes den feliz memoria, na Den Haag. Sr. van der Ven a conta cu el a topa Betico sinta den un luga scur den un huki hopi tristo. Y ora cu el a puntra Betico kico a pasa, Betico a bise cu e ta haya falta di su yiunan. “Esey ta algo cu bo ta relaciona cu ne sigur ora cu bo ta hopi tempo leu for di bo famia”, Prome Minister a expresa.
Finalisando, Prome Minister Wever-Croes a bisa cu den nomber di Gobierno di Aruba, ta gradici Nico van der Ven pa su asistencia di semper, dunando e un bunita reconocemento den forma di un moneda.
