Ministro Dangui Oduber
ORANJESTAD (AAN): E siman aki a bay sosega un pionero di Aruba su Turismo, sr. Harold Malmberg.
Ministro di Turismo aa para keto pa recorda cu hopi aprecio e tremendo impacto cu sr. Malmberg tabata tin ariba e crecemento di Aruba su turismo. Un visionero cu nos ta admira pa su dedicacion y compromiso pa posiciona pais Aruba como un destinacion di turismo na hente mundo. Un persona cu a contribui sin fin pa beneficio di henter comunidad di Aruba.
Un alma bondadoso cu tras di cortina y hopi modesto y discreto a extende yudansa na hopi persona den necesidad. Semper sr. Malmberg tabata tin palabranan di conseho balioso na personanan cu ta enfrentando retonan y dilemanan, y semper a demostra un curazon bondadoso, un spirito generoso, y actonan di compassion.
Sr. Harold Malmberg ta un di e pioneronan tras di creacion y desaroyo di De Palm Tours. Tambe a nombra sr. Malmberg pa medio di un Decreto Real pa su gran contribucion na e sector di turismo di Aruba. Tambe, mester menciona cu e tabata e visionario fundador tras di e Fondo di Pension pa e Sector Turistico di Aruba, considerando e necesidad pa e futuro di empleadonan di e Sector Turistico ta worde protegi door di un Fondo di Pension. E tambe a kere y para como sostenedor di e privatizacion di Aruba Tourism Authority.
Cu e legado profundo y e recuerdo di Harold por ta un inspiracion pa tur generacion. No solamente pa su exito como empresario pero tambe pa e caracter excepcional cu e semper a mustra durante su bida. E ta sirbi como un ehempel pa e generacionnan mas hoben, cu e balornan y virtudnan cu ta conduci no solamente na exito personal, pero tambe unda dedicacion y sacrificionan di un persona ta duna bendicion na hopi.
Minister Dangui Oduber ta extende condolencia mas profundo na famia y tur ser keri. Cu sr. Harold Malmberg sosega na paz.
