Muchanan lo haya dos dosis di e vacuna Pfizer:
- Weekend lo tin vacunathon pa e muchanan
- Autoridad na Hulanda a duna OK pa haci esaki
ORANJESTAD (AAN): Minister di Salud Dangui Oduber a confirma dialuna cu Aruba a haya e 'green light' for di Gezondheidsraad di Hulanda, cu a haci varios investigacion riba e posibel efectonan secundario di e vacuna contra Covid-19 den muchanan chikito.
Pa loke ta e dosis, esaki ta bay ta diferente. Ta bay aplica e vacuna Pfizer pero un dosis hopi mas liviano. Tur mucha entre 5 y 11 aña lo haya dos dosis y no tres manera ta e caso di e adultonan, Minister Oduber a enfatisa.
Basa riba e conseho ey, a haya conseho positivo pa bay over na vacuna muchanan entre 5 cu 11 aña.
Riba e efectonan secundario, e mandatario a agrega cu ta e mesun cu a wordo señala pa cu adultonan cu por ta un dolor di brasa, malestar, keintura of dolor di cabes. "Mi no ta kere cu e gezondheidsraad di Hulanda ta bay duna un conseho positivo si lo tabata tin algo malo cu e vacuna aki pa cu e muchanan", a expresa.
Ta keda na decision di cada mayor pa tuma e decision si nan ta bay di acuerdo pa vacuna nan yiu. Gobierno no ta bay forsa ni obliga ningun mayor pa haci esaki. Ta recomenda y aconseha, pero no ta bay obliga ningun hende pa tuma e vacuna, Minister Dangui Oduber a remarca.
E vacunathon pa muchanan entre 5 y 11 aña lo tuma lugar na Centro Deportivo Betico Croes na Santa Cruz diasabra y diadomingo di 9 am pa 4 pm.
