Parlamentario Jennifer Arends-Reyes:
ORANJESTAD (AAN) – Recientemente parlamentarionan di Aruba a conclui un programa intenso y productivo den Hulanda den cuadro di e reunionnan Tripartite, Interparlementair Koninkrijksoverleg (IPKO) y varios bishita oficial di trabou. Segun Presidente di Comision di Asuntonan di Reino y Relacionnan Exterior di Parlamento di Aruba, parlamentario Jennifer Arends-Reyes, e delegacion di Aruba a logra pone diferente tema importante y sensitivo riba agenda di Reino y alcanza acuerdo pa continua cu desaroyo concreto riba varios asunto di importancia nacional.
Segun Arends-Reyes, e reunionnan a confirma cu Aruba mester sigui participa activamente den e debate tocante futuro di Reino Hulandes y defendiendo interesnan di nos pueblo den tur instancia relevante.
“Aruba a laga su voz resona riba temanan fundamental pa futuro di nos Reino. E logronan riba e pasado di sclavitud, e geschillenregeling y e deficit democratico ta pasonan importante. Awor mester garantisa siguimiento y transforma e acuerdonan den resultado concreto,” Arends-Reyes a declara.
Un di e resultado principal durante e reunion Tripartite tabata e consenso alcanza entre Aruba, Curaçao y Sint Maarten pa sigui trata e pasado di sclavitud como un responsabilidad comparti dentro di Reino. E delegacionnan a enfatisa cu reconocemento di e historia no por keda limita na palabra y simbolismo solamente, sino cu mester traduci den accion concreto.
Entre e area identifica pa atencion continuo ta investigacion historico, educacion, preservacion di patrimonio cultural, reparacion social y iniciativanan cu por contribui na un futuro mas husto pa generacionnan presente y futuro. Ademas, e paisnan a aproba un resolucion conhunto expresando desaprobacion cu e posicion adopta recientemente den Nacionnan Uni tocante e resolucion cu a reconoci esclavitud como un di e atrosidadnan mas grave den historia di humanidad.
Otro tema importante tabata e continuacion di e discusion tocante e geschillenregeling, e mecanismo pa trata desacuerdonan den Reino. Segun Arends-Reyes, e paisnan Caribense a reitera cu mester tin un sistema independiente, imparcial y efectivo pa trata conflicto entre e diferente partnernan den Reino.
“Un Reino basa riba respet mutuo y igualdad mester tin un mecanismo confiabel pa trata diferencia di opinion. Ningun partner mester sinti cu e resultado di un conflicto ta determina door di un solo banda,” Arends-Reyes a indica.
Durante IPKO tambe a acorda pa sigui cu e trabou relaciona cu e deficit democratico den Reino. E preocupacion principal ta cu decisionnan y legislacion cu ta adopta na nivel di Reino por tin impacto directo riba Aruba, Curaçao y Sint Maarten, mientras cu e paisnan no semper tin participacion suficiente den e proceso di toma di decision.
Como resultado, lo sigui traha riba un comision special cu lo investiga con participacion democratico di e paisnan por wordo fortifica. E grupo lo evalua, entre otro, e posicion di e parlamentonan Caribense, e proseso di aprobacion di ley nan di Reino y posibilidadnan pa aumenta influencia di e paisnan den decisionnan cu ta afecta nan ciudadano directamente.
Ademas di e reunionnan parlamentario, e delegacion di Aruba a sostene diferente encuentro strategico cu institucionnan importante.
Na Raad van State, e delegacion a intercambia idea tocante e trayecto di HOFA y e importancia di logra un producto huridico cu ta mantene e balansa corecto entre responsabilidad y autonomia financiero di Aruba.
Na Clingendael Instituut, e delegacion a discuti desaroyo di capacidad institucional y e impacto cu cambionan geopolitico internacional por tin riba paisnan chikito manera Aruba.
Mientras tanto, durante bishitanan na Parlamento Europeo na Bruselas, a explora oportunidadnan pa cooperacion y acceso na fondo europeo den area manera energia renovabel, sostenibilidad, enseñansa, innovacion, digitalisacion y desaroyo economico.
Segun Arends-Reyes, e diferente reunionnan a confirma cu Aruba tin oportunidadnan importante pa fortalece su posicion internacional, amplia cooperacion y crea mas oportunidad pa futuro generacionnan.
“Nos mester sigui participa activamente den e discusionnan cu ta defini futuro di Reino y e relacionnan internacional cu Aruba. Solamente asina nos por sigura cu interesnan di nos pueblo ta representa y cu nos ta construyendo un futuro mas fuerte pa Aruba,” Arends-Reyes a conclui.
