Freddy Montoya, Lider di Proyecto na DCA:
ORANJESTAD (AAN)—John Freddy Montoya, lider di proyecto na Departamento di Cultura Aruba (DCA), den un entrevista cu DIARIO, a elabora riba e 21 aña di e celebracion nacional di Dia Mundial di Teatro, y tambe Reconocimento Nacional di Teatro, cu a tuma lugar Diahuebs 27 anochi.
Montoya a expresa cu esaki tabata un anochi maraviyoso, den cual a comparti e mensahe mundial di teatro cu rond mundo.
UNESCO a pidi pa Aruba elabora riba dje, Montoya a duna di conoce, y a indica cu Aruba a presente den un concepto mas crioyo, Arubaniza, y na nos idioma Papiamento. Asina a duna honor na e mensahe cu Unesco a declara.
Despues a presenta un obra di teatro den cual a mustra “sombranan di pasado” cu e actor mester a enfrenta den dos mundo: e mundo di escenario y e mundo dilanti camara.
“E ora ey nos a wak nos actornan representa un obra teatral cu tur e caracteristicanan cu tin, sin espacio pa duda, ni ekivocacion. Y, tambe un edicion di un pelicula cu ta mustra cu tambe teatro ta e raiz di tur otro arte, manera cine”, John Freddy a relata.
Despues a sigui cu e Premio Nacional di Teatro, cu a wordo otorga door di Departamento di Cultura, bao auspicio di Ministerio di Cultura. “El a wordo otorga na un organizacion cu den pasado a genera un impacto masha grandi cu nan balioso obra, y cu ta De Trupialen”, John Freddy a duna di conoce.
Ademas tabata tin un homenahe postumo den memoria di señor Ernesto Rosenstand, y prome premio di Literatura, dedica na Dennis Werleman.
Y e 15 actornan tambe a ricibi e honor di tin e Premio Nacional di Teatro como reconocemento special. “Nan ta actornan cu durante añanan a forma parti di diferente obra di teatro cu ser produci na Aruba, cu nos tin un aprecio masha grandi pa nan”, John Freddy a relata.
E 21 aña di celebracion di Dia Mundial di Teatro a wordo organiza pa Departamento di Cultura y a conta y a conta cu diferente artista cu a uni nan mes na esaki.
