Algun tips valioso! - ORANJESTAD (AAN): Aruba ta acercando e temporada di mas calor di aña, esta July, Augustus y September.
DIARIO a haya sa di Departamento Meteorologico Aruba (DMA), cu e chens ta grandi cu e temporada por extende te luna di October. Esaki ta debi na diferente motibo cu DMA ta bay trece dilanti:
(*) Indice di rayonan solar cu ta mas grandi durante e temporada di aña aki.
(*) Humedad halto den atmosfera cu ta ponebo sinti sofoca.
(*) E cantidad di bes cu fluho di biento normaal ta worde interumpi door di
sistemanan cu ta pasa den region of ta forma pafo di region local pero tin
influencia riba e biento.
Asina por haya nos den e temporada aki cu olanan di calor cu por afecta e isla of e region. Un ola di calor ta un periodo, usualmente 3 pa 5 dia, cu temperatura y humedad ta mas halto cu normal. Nos no por bay contra naturalesa pero por purba haci e efectonan di e calor aki menos. Pa haci esaki nos por haci lo siguiente:
(*) No para hopi den solo; buska refugio; no expone bo mes di mas na rayonan di solo, permanence mas tempo den sombra.
(*) Si ta necesariamente bo mester ta den solo usa crema contra rayonan di solo of sunblocker.
(*) Bebe hopi liquido den forma di awa of juice; sinembargo e juice no mester tin mucho sucu, sino e ta dunabo mas sed.
(*) Bisti paña di color cla; preferibel no usa colornan scur ya cu esaki ta bay ponebo sinti mas calor.
(*) Pa e hendenan cu ta gusta disfruta di lama, usa crema contra rayonan di solo, esta sunblocker.
(*) Si bo ta cana den solo usa sombre, petchi of algo pa tapa bo cabes contra di solo, tambe proteje e bista contra e rayonan di solo usando bril di solo.
(*) Semper busca loganan ventila of sinta den airco mas tanto cu bo por pa evita calor.
(*) Principalmente si bo ta sufri malesa di curason, sucu of precion halto, na e prome indicio di sinti bo curpa malo, acudi na un centro di atencion medico.
Pa loke ta trata influencia di sistemanan tropical riba e clima di tur dia, esaki por varia debi na diferente motibo: Esta e.o. con leu e sistema ta pasa, si e ta causa awacero of no, con fuerte e ta, kico e ta haci cu e biento den bo region.
Sistemanan tropical por causa awacero, hopi biento, lama bruto, pero afortunadamente e influencia aki riba e clima normal no ta duro hopi; un paar di dia kisas, despues tur cos ta normalisa.
Na e momentonan aki nos ta enfrentando Horcan Elsa, cu ta un menaza pa area di Caribe. Sinembargo na opinion di DMA Aruba, segun tur e pronosticonan, Elsa ta bay pasa na un distancia basta safe (mas o menos 375 pa 400 km) panort di Aruba. Esaki ke men cu nos lo no bay haya biento duro di Elsa, kizas algo di weer, awacero, strena cu lamper, y lama cu lo bay bira poco bruto pa un periodo di tempo no defini ainda; esaki, debi cu Elsa ta poco leu ainda pa bisa cu claridad kico ta bay pasa exactamente.
Pa e motibo aki ta pidi un i tur pa keda pendiente di e boletinnan di tempo cu Departamento Meteorologico di Aruba lo emiti pa asina keda informa di e situacion.
