Minister Presidente Evelyn Wever-Croes a informa:
ORANJESTAD (AAN) – Diahuebs mainta a tuma lugar e conferencia di prensa di Gobierno den cual, Prome Minister Evelyn Wever-Croes, a hiba palabra y a referi na diferente tema.
Entre otro, e dignatario a papia tocante VUT (Areglo di pago cu empleado publico mes ta pidi, pa retira mas trempan di trabao) cu a habri Diaranzon di e siman aki.
“VUT ta un di e instrumentonan cu nos a introduci y tin dos luna pa aplica, te dia 14 di Augustus. Tur esnan cu ta interesa pa aplica, y e ultimo fecha pa tuma e VUT ta 20 di September 2023”, Minister Presidente a splica.
El a reitera cu VUT ta un di e instrumentonan cu gobierno tin, den su esfuerzo pa baha gasto di personal den sector publico. E mandatario a haci un presentacion grafico, den cual a mustra cu, desde 2017, gobierno ta trahando riba gastonan di personal y tambe e cantidad di personal den servicio di gobierno na final di 2017, ora e gobierno a sinta. E ora ey tabata tin 4.800 y pico empleado, y ya na fin di 2021, el a baha 4.518. Pues, den termino absoluto e cantidad di empleadonan a baha cu 351 persona, kiermen 7.22%.
E mandatario a splica pakico e ta uza e termino “absoluto”. Esaki pasobra tin personal cu a wordo reemplaza, pero tin hende cu a tuma retiro y no a wordo reemplaza, y e saldo den termino absoluto ta e 351 persona aki.
Den placa, atravez di grafico, e mandatario a splica cu e gastonan di personal a baha durante e añanan. Na aña 2018 a papia di 476 miyon florin; na 2019, el a baha cu 0.3%, na 2020 a baha cu 10% y na 2021 a baha adicionalmente cu 2.3%.
Premier Wever Croes a splica cu e dos graficonan cu el a describi ta inclui den e relato anual di 2021 di Ministerio di Asuntonan General.
E mandatario a elabora tocante e proyeccion pa bay pa dilanti, locual DIARIO ta trece dilanti den otro articulo.
