Barco di Nicolas Maduro a pega riba baranca na frontera
- Sistema digitalisa pa drenta Aruba y salida di COHO di Reino
- Turbulencia na Merca y e grito pa cambio politico na Hulanda
ORANJESTAD (AAN)- Cu 2023 lo a trece un ola di desaroyo, tabata algo cu DIARIO a splica su lectornan for di momento cu 2022 a cuminsa prepara pa despedi.
Con impactante 2023 ta, awor ta keda demostra cu e cantidad di acontecimentonan importante rond mundo y tambe na Aruba.
Semana Santa a haci su entrada den un Aruba cu a regresa na normalidad, cu ta inclui e tradicion di campa.
Tur informacion ta indica cu autoridad ta bon prepara pa drenta den accion mientras nos ta spera cu tur hende lo coopera pa trankilidad na Aruba y tambe evita sucesonan lamentabel.
Ora ta papia di campa ta papia di laman y costa y e responsabilidad periodistico di DIARIO a exigi extra vigilancia di informacionnan tocante sucesonan importante den e vecindario directo di Aruba.
Importante ta e informacionnan cu nos a topa riba cargamentonan di droga na e costa Venezolano, cu segun informacionnan internacional lo ta fungi como un conexion importante di un tipo special di Marihuana Colombiano, pa otro teritorionan na Latino Americano y den Caribe.
Luna pasa na La Quajira na e frontera entre e dos paisnan, Polis Colombiano a conkista 2.5 tonelada di Marihuana.
No mester mira solamente e hecho cu ta trata di un substancia prohibi, pero mester tene na consideracion tur e peligronan cu black market ta forma pa un region cu a base di esaki ta conoce un aumento di actonan peligroso pa seguridad nacional y di tur hende cu aumento serio di criminalidad.
Ta den cuadro di e informacionnan cu nos a sigui riba traficacion di droge y otro delito den e region, cu nos mester a aplaudi e exigencia di Gobierno di Aruba pa Venezuela cumpli cu e exigencianan di Gobierno di Aruba, prome cu por habri e portanan di Aruba pa Venezuela.
Esaki ta encera pues cu mientras no tin cumplimento cu loke Gobierno Evelyn Wever-Croes a exigi, no ta habri frontera cu lo keda cera despues di Prome di Mei 2023 a menos cu Venzuela cumpli cu loke e mester haci.
En corto por bisa pues cu e barco di San Nicolas Maduro no por biaha pa haf di Aruba cu banana ni otro fruta, a menos cu seguridad di Aruba y e Arubiano ta wordo segura.
Ora papia di porta di Aruba, un noticia alentador ta bini dilanti cu ta e entrada digital pa pasaheronan cu yega Aruba segun e sistema ultra moderno, cu ta reemplasa e presentacion di un pasaporte, manera anuncia dor di Ministro Dangui Oduber.
Atraccion di e turista Mericano sigur a bira mas interesante den fin di siman a base di e sucesonan na Merca, caminda e siman aki lo por spera e detencion di ex Presidente Donald Trump kende ta wordo acusa di a paga un muher placa pa silencia un relacion pafor di matrimonio cu nan lo tabata tin cu otro.
Desaroyonan cu por causa basta turbulencia na Merca, cu ainda ta lucha cu e resultadonan di inflacion.
Mientrastanto, manera a keda acorda algun luna pasa, Prome Ministro Evelyn Wever-Croes a biaha pa Hulanda caminda e lo mester firma un acuerdo cu Reino Hulandes pa asina reemplasa e conocido COHO, cu lo tabata un Ley di Reino pa atende asuntonan financiero di e paisnan Hulandes den Caribe.
COHO tabata parti di e exigencianan di Hulanda cu kier a mara e reforma obligatorio di maneho financiero di Aruba na un Ley di Reino, cu, sinembargo, a bay di acuerdo pa Gobiernonan di e paisnan Hulandes den Caribe mes percura pa un maneho financiero saludabel di placa di Pueblo pa asina cumpli cu e garantianan cu Statuut ta brinda na e ciudadano Hulandes na teritorionan Caribense tambe.
Problema politico a bati na porta di Hulanda tambe despues di un eleccion pa Eerste Kamer (Senado) Hulandes. Cambio ta loke e Pueblo Hulandes a exigi den e ultimo eleccion, cu no ta pa Parlamento (Tweede Kamer) pero si ta exigi e Gobierno Hulandes actual cu ta representa e voto publico pa Tweede Kamer, pa tene cuenta cu e boluntad di Pueblo.
Manera imediatamente despues di eleccion Hulandes, DIARIO a splica, e situacion ta sumamente dificil pa mundo politico Hulandes ya cu e mayoria den Tweede Kamer cu ta sostene Gobierno Hulandes te proximo Hulandes, no ta presente den e constelacion di Eerste Kamer cu a wordo eligi ultimamente.
April 2023 ta topa cu e mundo cu por a spera for di momento cu 2023 a haci su entrada.
Na costa di Aruba no solamente campamento ta bira visibel pero tambe e barco di fruta di Nicolas Maduro a naufraga den e barancanan cu ta marca e frontera Venezuela y Aruba cu ta cera!
