ORANJESTAD (AAN): E siman aki, un app nobo desaroya pa Aruba ta duna consumidor mas informacion, mas opcion y mas control riba nan gastonan di supermercado.
Cu e app aki, inmediatamente lo bo haya sa unda e productonan cu bo ta cumpra tur siman ta mas barata. E app yama ‘Unda’, y e ta introduci un manera nobo y inteligente pa consumidor na Aruba haci nan compras. Cu e app, bo ta djis scan e barcode di un producto cu bo smartphone y compara e ultimo prijsnan conoci di e mesun producto na diferente supermercado na Aruba.
E idea ta simpel: Prome cu bo cumpra, bo por check na unda e producto ta registra pa un prijs mas abou.
Cada siman, miles di consumidor ta haci compras na supermercado, pero hopi biaha sin sa si e productonan cu nan ta cumpra ta disponibel pa miho prijs na otro establecimento.
Cu e aplicacion, consumidor por scan e barcode di un producto of busca e producto directamente den e app. Den algun seconde, ‘Unda’ ta mustra e ultimo prijsnan registra pa e producto na diferente supermarket. Asina bo ta compara prijs rapido.
Cu e app ‘Unda’ tambe por añadi productonan na bo ‘Shopping list’, y wak na cua supermarket bo lista aki lo salibo ta costa menos.
‘Unda’ ta tambe un plataforma cu ta invita comunidad pa participa activamente den mantene e informacion di prijsnan mas completo y actualisa. Bo mes por yuda agrega productonan cu ainda no ta den e sistema, registra prijsnan nobo y verifica of actualisa prijsnan existente. Di e manera aki, cada contribucion ta yuda haci e app mas util pa tur hende.
E ambicion ta pa ‘Unda’ sigui crece, amplia su cobertura di supermercado, agrega mas producto y bira un herment cu consumidor por consulta regularmente prome cu nan haci compras.
Link pa download e app aki ta riba www.unda.cheap y descubri na unda bo compras por ta mas barata.
