Minister di Turismo ta señala:
ORANJESTAD (AAN) – Minister di Salud y Turismo, Dangui Oduber, a duna informacion tocante turismo crusero, cu tambe ta forma parti di e recuperacion di Aruba su turismo.
E dignatario a duna di conoce cu e recuperacion di turismo crusero a cuminza un tiki mas lento, mas slow, compara cu e cantidad di bishitantenan stay over. Esaki ta pa motibo cu Aruba a habri su fronteranan maritimo den luna di Juni 2021, cu a ricibi e prome barconan, pues un aña despues cu a habri e fronteranan aereo. “Y tambe, pa turismo crusero tin mas protocol estricto, cu e turistanan cu ta yega Aruba via aeropuerto. No obstante esey, APA a ricibi durante e prome seis lunanan di aña 2022, 263.472 turista crusero y esaki ta un recuperacion di 61%. Y Aruba Ports Authority ta proyectando un recuperacion di 65% ora 2022 cera, cual sigur, ta sumamente positivo considerando con e aña a habri cu e variante Omicron y e protocolnan stricto cu tabata tin pa e turistanan crusero, toch nos ta mira un bon resultado, un bon performance, pa loke ta trata su recuperacion”, Minister Oduber a señala.
Aki algun siman lo tin anuncionan importante tambe, pa desaroyo di Aruba su economia, unda lo informa tocante un proyecto grandi di Aruba Ports Authority: uno ta Port City y otro ta e terenonan cu tin disponible pa Barcadera. E dignatario lo yama un conferencia di prensa al respecto, pa informa comunidad.
“Nos ta hopi satisfecho con nos turismo ta desaroyando e prome seis lunanan di aña y e proyeccionnan pa e siguiente seis lunanan tambe ta dunando indicacion cu lo mantene e mesun tendencia positivo aki, di yega bek na nivelnan di 2019 y tambe surpasa esakinan. Nos ta spera cu nos por mantene e tendencianan aki, pero tur e proyeccionnan cu nos tin pa loke ta e cantidad di bishitantenan stay over, crusero y tur e otro indicadornan, ta mustra cu nos por mantene e mesun tendencia, cu sigur ta algo hopi positivo pa turismo, nos economia y progreso di nos pais”, e mandatario a conclui.
