Dr. Luc Alofs, di Universidad di Aruba:
ORANJESTAD (AAN) – Dr. Luc Alofs, docente na Universidad di Aruba, den entrevista cu DIARIO a informa cu awe, Diaranzon 28 di Februari, tin un anochi informativo na Universidad di Aruba (UA) tocante e tema “Herencia di Sclavitud”
Dr. Alofs a duna di conoce cu e aña aki lo tin diferente encuentro tocante e tema di “Herencia di Sclavitud”. El a expresa cu manera hopi hende sa, Hulanda a ofrece su excuus pa cu su rol den sclavitud y traficacion di hende transatlantico.
“Na Universidad nos a pensa cu nos tambe kier tuma tempo pa dedica na e topico ey. Nos sa cu na Aruba e no tabata un tema hopi conoci ni hopi popular tampoco, y e aña aki nos ta ofrece tres of cuater evento y Diaranzon awo ta e siguiente anochi di informacion y nos ta bay tin varios orado”, Dr. Alofs a indica.
El a anuncia cu e prome orado ta bay ta e artista Vanessa Paulina, cu ta hopi conoci pasobra el a traha un coleccion di diferente pintura di e mucha muher Arubiano Virginia, cu a wordo esclaviza y a bira hopi popular y conoci door cu semper e tabata un rebelde contra e hecho cu durante su bida e no por a biba den libertad.
E di dos ta di e docente di U.A, Peter van der Berg, ken ta bay elabora riba un tema masha interesante, tocante con e leynan, e reglanan, a purba di defende of proteha e seguridad di e hendenan esclaviza aki na Aruba. “Nos hendenan esclaviza tabata tin derechonan y Peter van der Berg ta bay elabora con esaki a desaroya”, Dr. Alofs a comenta.
Dr. Alofs mes hunto cu Kenny Meyers (ken lo no ta presente door di trabao na Avond Havo) a traha un presentacion tocante con sclavitud ta representa den material pa scol. Nan ta presenta e anochinan informativo hunto cu e Bureau di Traficacion di Hende, y hunto cu nan lo elabora riba actualidad di sclavitud y aspectonan cu ta manera sclavitud. Señora Richardson- Baars tambe lo elabora riba e tema aki.
