Carl Michael Bikker, Presidente Centro di Bario Dakota a informa:
ORANJESTAD (AAN) – E presidente di Centro di Bario y Deporte Dakota, Carl Michael Bikker, a yama un conferencia di prensa, pa anuncia proyectonan cu nan ta bezig cu ne, y actividadnan cu ta bay tuma lugar durante December awo, pa e organizacion por haya fondo, pa asina por sigui drecha y reconstrui e Centro di Bario di Dakota.
Dia 16 di December ta bay tin un Nochi di Pasco, (Christmas Bazaar) dilanti di e parkeer plats di e centro di bario mes. E ta cuminza pa 5 or di atardi y lo termina pa, mas of menos, 10 or di anochi.
Lo bay tin diferente tent di cuminda, coi dushi, artesania, y un variedad di articulonan di Pasco lo wordo bendi e dia aki.
Ademas lo tin presentacion di varios grupo musical, entre otro, Grupo Betico. Bikker a sigui bisa cu trabaonan den e Centro di Bario Dakota ta tumando lugar caba, y e trabao di su bestuur ta mantene y embeyece nan Club.
Diadomingo 17 lo tin e fiesta tipico den bario, cu lo tuma lugar den e parti paden di e Centro, y e ta cuminza pa 5 or di atardi, unda lo tin un ambiente unico, cu diferente grupo musical, cu lo alegra e anochi. Ademas, lo tin cah’i orgel. Lo tin grupo Herencia di Rooi Cochi, Grupo di Aguinaldo “Stima mi”, y lo sera e anochi e grupo “Azucar” di Robert Maduro.
Den e anochi di dia 17, lo reconoce dos valuarte di Bario Dakota, pa asina nan por haya e honor mereci, pa loke ta trata nan contribucion na e folklore y cultura di Aruba.
Tur esaki lo tuma lugar hunto cu e partnernan CEDE Aruba y Barionan unico, y un par di empresa comercial. Dia 16 e actividad ta gratis pero dia 17 si lo cobra un contribucion chikito. Esaki ta mas bien pa yuda e fundacion di e gruponan tipico pa nan tambe por sigui haci actividadnan den nan aña calendario rond di Aruba.
