Diego di Cuba, lider sindical:
*Tambe pa su persona cu a wordo retira di Triple A
ORANJESTAD (AAN) – Diego de Cuba, Presidente di Sindicato di Trahadornan di Aruba (STA), den entrevista cu DIARIO a señala cu “pa ta sincero cu ne mes y cu Dios”, aña 2023 tabata un di e añanan mas duro pa sindicato STA.
“Aunke mi tin cu bisa cu tur caminda cu nos a logra yega na Contratonan Colectivo, nos a conoce adelanto. Na Triple A mes nos a conoce adelantonan barbaro. Den e CAO di Paradise Beach Village tambe nos a mira adelantonan, un di e CAOnan unda e parti financiero tabata un kibramento di cabes bastante formal tabata esun di NV ELMAR.
Pero mirando e hecho cu pa hopi tempo, nos ta kere cu mester a bin un structura nobo na NV Elmar y nos a cay net den e negociacionnan caminda cu e cambionan ey mester a wordo introduci, y pa evita cu e clase trahado ta bay atras den e forza financiero, basta negociacion lo mester a tuma lugar, danki Dios nan ta tras di lomba y mi ta kere tur hende ta navegando cu un base trankilo, den e compania, y practicamente ningun hende a bay atras”, Diego de Cuba a subraya.
El a agrega cu tin cu kizas ta pensa cu a keda “gevries” na cierto caminda pero apart di esey STA a aregl'e den un sistema cu tur hende ta bay disfruta di un adelanto toch.
“Pero e no tabata un aña facil. Aña 2023 ta cerando mi mesun persona sin trabao na Triple A NV, y nos sa cu e compania a reorganiza durante e pandemia y 65 hende a bay cas, y despues di esey nan no a stop di reorganiza y nan a kita mas hende for di trabao, 11 persona en total segun mi. Mayoria di nan mester a paga nan pa bay. Pero si mi pone ami mes den e luz di dia di Triple A NV, ami tabata e target pa nan kita for di trabao y nan a logr’e tambe. Nan a gana mi tambe den Corte, y aworaki nos ta bezig cu bodemprocedure y mi sa cu nan a bin riba mi, pasobra esaki ta e prijs cu un sindicalista tin cu paga ora cu e ta bringa pa e clase trahado”, Diego de Cuba a subraya.
