Parlamentario Rocco Tjon ta splica:
*Servicio huridico, Codigo di Proteccion, entre otro ta na peliger
ORANJESTAD (AAN) – Parlamentario Rocco Tjon, di fraccion di MEP a elabora riba e reaccion di Departamentonan cu ta brinda servicio na comunidad, y cu via un amienda presenta pa AVP, durante tratamento di presupuesto, lo trece e servicionan aki na peliger, afectando esnan mas vulnerable den comunidad.
El a cuminza cu DAS: “Departamento di Asunto Social ta bisa specificamente, cu loke ta e mudanza cu mester tuma lugar e aña aki, pa saca e personal di unda nan ta aworaki, den un edificio na San Nicolas, pa un edificio nobo, esey lo por bin na peliger. Nan ta papia tambe di e trayecto cu nan ta aworaki pa loke ta certificacion di ISO, cu tambe lo trec’e na peliger”. Parlamentario Tjon a señala.
Pero loke mas ta preocupa su persona ta cu e diferente servicionan cu DAS ta brinda na nos ciudadanonan, no lo por wordo brinda mas, manera asistencia huridico pa personanan di menos recurso, y manera ta conoci nan ta cubri gastonan di entiero pa famianan di menos recurso, nan lo no por cubri esaki mas, nan ta paga tambe ora personanan di menos recurso tin di bay afo, pa cuido medico, por ehemplo, si AZV no ta cubri esaki, anto un cortamento den esaki tambe lo trece e servicio aki na peliger.
“Y asina nan ta sigui menciona diferente servicio cu nan ta brinda den e prome y di dos liña, cu lo bin na peliger, entre otro sigui fortifica e Codigo di Proteccion y tambe e sistema di traha pa locual nan ta implementa aworaki pa duna mas guia y ayudo na, entre otro, menornan y nan famia, etc.” Parlamentario Rocco Tjon a remarca.
Tjon a subraya cu e impacto aki ta hopi grandi. Anto DAS ta finaliza su carta pidiendo pa recapacita e decision aki.
