Un mercado nobo pa Caribe a nace!
ORANJESTAD (AAN): Ta conoci cu un cantidad grandi di hendenan influyente, hende cu placa, y personanan di e.o. California a muda ultimo añanan y bay biba na Austin, cu ta capital di estado Texas. Y varios sede di companianan tecnologico a muda tambe pa eynan.
Tur esaki ta trece cu di anochi pa dia, Austin a bira un ciudad hopi importante cu hendenan buscando forma pa bay vacantie pa gasta placa cu nan ta gana laborando na e companianan aki. Y pa e motibo ey, American Airlines a cuminza expande vuelonan non-stop cu ta sali di Austin y cu conexion pa Caribe.
Y siguiendo asina pa traha riba nan gateways disponible non-stop for di Merca, aki 3 luna un vuelo lo cuminza for di Austin rumbo pa Jamaica. E vuelo aki for di Austin-Bergstrom International Airport pa Montego Bay lo cuminza bula dia 4 di Juni 2022.
“Nos ta hopi contento pa expande nos partnership balioso cu American Airlines, e aerolinea mas grandi cu ta bulando pa Jamaica, via di e ruta nobo aki,” ta loke Director di Turismo na Jamaica, Donovan White a bisa. “E vuelo nobo non-stop di Austin ta complementa e servicio existente di e aerolinea for di Dallas/Fort Worth y ta ofrece un otro opcion conveniente pa pasaheronan yega nos isla e verano aki.”
American Airlines lo usa e vuelonan aki non-stop riba Diasabra, usando un avion Embraer ERJ-175 cu tin 12 asiento di First Class, 20 Economy Premium, y 44 asiento den Economy.
American Airlines ta bula tur dia diferente vuelo pa Jamaica, y desde November cu a pasa, nan ta usando un avion Boeing 787-8 Dreamliner pa vuelonan rumbo pa Montego Bay, for di nan hubnan principal di Dallas/Fort Worth, Miami, y Philadelphia.
