Diadomingo anochi lo tin anochi special na Biblioteca
ORANJESTAD (AAN): Alliance française Aruba (AfA) lo celebra 14 di juli 2024 su aniversario na Biblioteca Nacional di Aruba.
AfA inoficialmente a lanta na 1967 den cooperacion cu Alliance française Curaçao y a celebra na 1992 su 25 aña di existencia e tempo ey na Hyatt Regency Hotel & Casino. Via un Landsbesluit, AfA a wordo registra oficialmente na 1979. Pesei oficialmente ta celebra esaki desde su fundacion oficial cu ta for di 1979 pa 2024, esta 45 aña. Pero AfA tin su marca ya pa 57 aña na Aruba.
Na aña 1992, ya AfA tabatin anteriormente 9 presidente y for di 1979 te cu presente 6 presidente: Maria A. da Silva†, Marguerite M. Croes-Duplessy†, Joan C. Driessen-Bennett†, Nelly A. C. Aal-Royer, Carl A. E. Rijsdijk† y e presidente actual Eric E. Vinck.
AfA ta afilia cu Alliance française di Paris, e organisacion cu a wordo funda 21 di juli 1883, cu tabatin principalmente como objetivo promove e lenga y cultura frances. Esey ta actualmente mescos aunke e concentracion ta keda na e siñamento di frances.
Cu su sede na Paris, Alliance française tin mas di 1016 centro den 137 pais den tur continente habita cu mas di 440.000 estudiante. E organizacion nan pafo di Paris ta franquicia nan local independiente y cada un tin su board y un presidente.
Aruba ta trahando hunto cu Paris pa concretisa e Alliansa oficialmente, pesey ainda no ta aparece como sede. Despues cu Aruba y Corsou a parti desde 1986 cu a haya Status Aparte, esaki no a wordo concretisa, pero pronto, e aña aki mes, esaki ta un realidad.
AfA tin 2 biaha pa aña curso cu ta cuminsa na september y na februari di tur aña. Cada curso tin un duracion di 12 siman largo, 1 biaha pa siman. Tin curso pa adulto, pa mucha, pa estudiante hoben y pa latino.
E nivelnan ta basa ariba e Cuadro di referencia Europeo pa idioma, e conocido nivelnan A, B y C.
AfA ta sigui promove frances y ta sumamente contento cu frances ainda ta wordo ofreci na Colegio Arubano VWO y alabes kier gradici rector Sr. Tim Croes pa sigi mantene esaki bibo.
AfA ta spera cu De Schakel VWO y Mon Plaisir VWO lo uni nan mes cu Alliance française Aruba y cu den futuro nos por reconoce e miho alumno di frances na e scol nan ey tambe.
Diahuebs anochi, esta 4 di juli ultimo, AfA tabatin e previlegio di otorga na na e graduacion di VWO (di Colegio Arubano) un plakkaat na e alumno Samuel Jamil Tromp, como reconocimento pa su resultado y curashi pa tuma frances y gradua cu e miho resultado.
AfA ta celebra 14 di juli 2024 (‘Jour de la Bastille’) hunto cu Biblioteca Nacional di Aruba (BNA) cu tambe ta cumpli 75 aña di existencia e aña aki. BNA ta un tremendo partner cu ta sostene AfA den tur forma pa por pa sigi mantene e lenga frances bibo aki na Aruba.
E anochi di 14 di juli lo tin diferente reconocimento, declamacion di poesia, historia di BNA y Aruba como simbolo di e relacion Francia-Aruba, presentacion di baile frances, canto na frances y entrega di certificado.
Den BNA tin un skina cu hopi buki na frances y ta gradici entre otro famia Leto di Francia y sr. Jan Geurtz pa nan contribucion incondicional na AfA pa hopi buki cu awe ta na BNA y ta na disposicion di e pueblo di Aruba, especialmente esnan cu ta interesa pa lesa y siña e idioma frances.
Pesey, door cu BNA a sostene AfA durante ya pa 5 aña largo cu Eric Vinck ta presidente (desde 2020), AfA kier a celebra esaki hunto cu BNA. Gratitud inmenso ta bay pa Sra. Astrid Britten, directora di BNA, cu a habri su porta nan pa Alliance française Aruba y tambe sra. Yosmar Sneek di BNA cu semper a intermedia pa logra yuda AfA den hasi esaki nan realidad.
Tur prome diasabra di luna pa 09:00, tin e ‘Rendez-vous conversation’ na BNA. Esaki ta completamente gratis y tin como meta pa combersa riba cierto tema y cada persona presente ta desaroya di e forma aki su frances.
AfA ta bolbe atrobe na september proximo, cu e ‘Soirée cinéma’ (nochi di pelicula na frances). A bin ta tene esaki for di 2020 te 2022.
AfA ta extende un cordial invitacion na e pueblo di Aruba pa sigi sostene AfA den su meta pa mas tanto persona uni nan mes pa siña e lenga frances.
