DIARIO pendiente for di momento cu delegacion Biden a bay Caracas --- Chevron Mericano lo libera Nicolas Maduro pa por sanciona Rusia? --- Den porta di Aruba guera di Ukraine ta produci panorama unico
ORANJESTAD (AAN) - Medidanan economico ta uno di e armanan, cu mundialmente ta wordo tuma contra regimennan cu ta haci nan mes culpabel di violacion di basenan cu mester sostene democracia y bienestar di hende entre otro.
Awe medidanan contra Rusia pa motibo di atake di Ukraina ta hopi den noticia, pero ya tabata tin medida contra Rusia na vigor mescos cu medida pa un cantidad di paisnan, cu no ta honra e conceptonan di democracia.
Uno di e gobiernonan cu a wordo castiga pa su maneho den e region directo di Aruba, ta e gobierno di Nicolas Maduro cu a wordo gescrap como pais cu ta entrega por ehempel productonan petrolero na paisnan democratico.
Ta e sancionnan contra Gobierno di Nicolas Maduro ta e problema economico y financiero mas grandi di Nicolas Maduro, cu a perde un parti grandi di su negoshi petrolero y ta depende actualmente di Rusia y otro paisnan controversial.
E caida di economia Venezolano tabata intenciona pa deshaci di dictadura na Venezuela y retorno di gobierno Democratico.
Nicolas Maduro a entrega su mes na Gobierno di Rusia y tin debe grandi cu Rusia, cu mescos cu otro paisnan di fama dudoso, tin Venezuela rehen di nan expansion economico.
DIARIO na varios ocasion a adverti pa e situacion serio na Venezuela, den porta di Aruba, cu awor ta conoce un angulo nobo.
Algun tempo pasa, bishita di un delegacion di Gobierno di Joe Biden di Merca na Venezuela, a haya hopi atencion.
Tabata hustamente na momento cu e crisis di Ukraine a causa un situacion mundial economico serio den cual e negoshi petrolero ta ocupa un lugar central.
Sancionnan di paisnan liber contra Rusia, tabata dirigi pa un parti importante riba sancionnan cu lo a afecta comercio cu Rusia y den esaki sigur e posicion fuerte di Rusia como productor mas grandi di petroleo na mundo.
Paisnan liber a cuminsa busca formanan nobo pa haya petroleo necesario y den e situacion aki e delegacion di Presidente Biden di Merca, a biaha pa Venezuela, caminda e compania Mericano Chevron como partner di PDVSA, ta hunga un papel importante.
Critica mundial tabata e resultado di e acercamento entre e grupo Mericano y Venezuela, caminda Chevron a pidi Gobierno Biden pa deshaci di e medidanan cu ta stroba su actividadnan comercial.
Manera DIARIO a splica e situacion a bira controversial pero awor ta bini dilanti, cu Gobierno Mericano lo ta dispuesto pa habri caminda pa dos compania Venezolano por manda petroleo pa Europa pa asina reemplasa e negoshi di petroleo cu Rusia.
Preguntanan serio a cuminsa wordo lansa den e ultimo dianan y sigur tin relacion cu e realidad cu paisnan manera Merca ta habri posibilidad comercial pa Gobierno di Nicolas Maduro, cu publicamente a bisa cu e ta sostene Rusia den e crisis di Ukraine.
DIARIO ta den contacto cu su informantenan cu ta indica cu un situacion comercial internacional por rementa den negoshi mundial di petroleo, cu segun acuerdonan di clima mester cuminsa baha su produccion.
E caos comercial mundial cu a wordo produci pa e atake di Rusia riba Ukraine, hustamente a crea un ampliacion explosivo di negoshi den petroleo, cu na su turno ta wordo sirbi dor di e interesnan enorme den sector petrolero mundial.
Kico apertura di posibilidad pa Nicolas Maduro, directamente mara na Rusia, uza sancion contra Rusia pa e crece, lo nifica ta parti di informacionnan cu DIARIO prepara pa su lectornan den un situacion mundial, cada bez mas confuso.
