Sucursal di ELMAR a amplia orario di servicio pa clientenan di SmartUp Prepaid
*ELMAR su intencion ta pa ofrece e cliente dos opcion di recarga
ORANJESTAD (AAN): Pa medio di un comunicado di prensa, Vocero di ELMAR a duna di conoce cu Diahuebs 1 di februari 2024, a introduci un opcion di pago adicional via e app di Pay.Aw di SETAR, cual tin como meta pa brinda mas conveniencia na e clientenan cu ta prefera transaccion online. E lansamento di pago via Pay.Aw tabata un introduccion di forma extra di pago, na banda di e dos formanan di pago existente cual ta na sucursal di ELMAR y na pomp stacionnan rond di Aruba. E introduccion aki no tabata tin como intencion pa reemplaza e otro formanan di pago existente.
Sinembargo, ELMAR a haya informacion diabierna 2 di februari, for di nan clientenan cu ta prefera un transaccion personal, cu tin pomp stationnan a stop e servicio pa recarga nan cuenta di SmartUp Prepaid. E Aruba Gas Dealers Association (“AGDA”) a tuma e decision pa suspende e servicio aki sin notificacion previo na ELMAR of e clientenan.
E meta ta keda pa ofrece e clientenan diferente opcion di pago considerando tur preferencia di e clientenan.
Actualmente ta trahando activamente pa busca un solucion pa e clientenan di SmartUp Prepaid. Pa facilita e clientenan di SmartUp Prepaid service, e sucursal di Oranjestad lo ta habri:
Awe, diasabra 3 di februari 2024, for di 8:00 am te cu 4:00 pm
Diadomingo, 4 di februari 2024, for di 8:00 am te cu 4:00 pm
Entrante dialuna 5 di februari 2024, tanto e sucursal di Oranjestad como esun di San Nicolas lo ta habri for di 7:45 am te cu 8:00 pm. Alabes nan Contact Center tambe lo ta habri e mesun orarionan cu nos sucursal di Oranjestad. Mientrastanto, kier encurasha e clientenan di SmartUp Prepaid y EV ChargeUp pa explora e opcion di pago digital disponibel via e app di Pay.Aw.
ELMAR ta urgi nan clientenan di SmartUp Prepaid cu ainda ta dispone di un meter STS (manual of cu keypad), pa haci uzo di e oportunidad aki pa recarga coriente na un di nan sucursalnan. E forma di pago via Pay.Aw no por wordo utilisa pa e meternan aki.
E clientenan di SmartUp Prepaid por keda trankil cu si ricibi notificacion durante anochi cu e cantidad di kWh ta cabando, e meter Prepaid lo continua suministra coriente te cu 8:00 am, dunando asina e oportunidad pa pasa recarga su siguiente mainta na sucursal di ELMAR. Esaki ta conta solamente pa clientenan Prepaid cu smart meter.
ELMAR kier urgi clientenan Prepaid cu meter STS (manual of keypad) pa recarga durante orarionan nobo di servicio.
ELMAR ta gradici tur cliente di SmartUp Prepaid pa nan comprension mientras ta trahando duro pa atende cu e asunto aki. Ta mantene un compromiso pa informa boso tocante e desaroyonan y avansenan durante e proceso aki.
