Como aporte pa enfrenta e crisis social:
ORANJESTAD (AAN) – Algun miembro di fraccion di MEP a bin hunto pa elabora riba e crisis social cu tin na Aruba, no solamente den e aspecto economico pero tambe den e aspectonan social, humano, emocional, etc. Pues, no unda por wak cifra sino cu hopi famia ta cay foi otro, e muchanan ta wordo afecta grandemente, y sucesivamente por wak un deterioro den nan siñamento na scol. Nan ta bay atras emocionalmente, locual por hiba nan riba un mal caminda.
Den cuadro di esaki, algun miembro di fraccion di MEP a dicidi pa bin cu seminarionan cu nan ta proyectando pa luna di Juni, y pesey nan ta yamando “parehanan extraordinario”.
Berlis a splica cu esaki ta un seminario enfoca riba famianan kibra, na unda nan lo comparti tips, anochinan cu parehanan cu ta registra, pa asina comparti experencianan, pa e nucleo di famia por wordo fortifica di gran manera.
“Y asina tambe, manera nos sa, famianan sano ta haci un comunidad fuerte, stabil y sano, unda cu nos pais por bay dilanti, manera cu nos kier mira den e diferente areanan”, Marco Berlis a señala. El a agrega cu esaki ta bay ta un formacion special, di algun siman. Pa tur e parehanan cu kier registra pa esaki pronto lo anuncia e fechanan y duracion. “E idea ta pa hiba e seminarionan aki na diferente distrito di nos pais.
Nos ta hopi emociona pa esaki, pasobra nos sa, como parlamentarionan, cu nos ta representa pueblo. Y nos ta kere cu door di esaki nos kier sali eyfo, demostra y aporta na bienestar di nos pais, nos famianan, nos parehanan, nos hobennan, pa asina na un otro manera aporta na un comunidad mas sano y asina nos tur por bay dilanti na un manera fuerte”, Parlamentario Marco Berlis a señala.
