Comerciantenan Uni ta lamenta esey...
ORANJESTAD (AAN): E organizacion di Comerciantenan Uni Aruba (CUA) tambe tabata presente den reunion cu Gobierno y companianan di Utilities Aruba NV a ofrece na gremionan pa splica e situacion cu a conduci cu nan mester a adapta tarifanan di awa y coriente entrante Augustus.
Francis Saladin di Comerciantenan Uni, a indica despues di e reunion cu e invitacion mes nan a haya di Ministro Glenbert Croes. A haya un splicacion riba e filosofia cu WEB Aruba NV tin pa sigui un maneho pa semper purba na reduci e tarifa cu ta cobra pa produci awa y coriente, y con keto bay e compania ta depende di combustible HFO (Heavy Fuel Oil) den su planta na Balashi.
Aki ta unda cu e prijs di HFO ta loke ta afecta e costo pa produci coriente y awa na e isla. Pesey WEB Aruba NV ta dirigi su mes pa haci uso di equiponan mas eficiente, cu di e forma ey ta pone cu tin di usa menos combustible, cu por yuda baha tarifa pa pueblo.
Segun Saladin, nan ta contento cu e presentacion cu a wordo duna, y asina bo ta compronde mas profundo e trabao cu e companianan di utilidad ta ocupa cune. Por mira cu den futuro, basa parcialmente riba e hecho cu nan ta casi cla (algun luna mas) cu e di tercer motor RECIP Phase 4 instala na Balashi pa yuda genera coriente, y esey ta pone cu envez di usa 4.000 bari di HFO pa dia, e lo bay pone cu tin di usa solamente 3.000 bari di HFO pa dia. Esaki lo ta un spaarmento di como 25% pa e compania. E idea ta pa e spaarmento aki ta wordo pasa mesora pa e consumidor.
Fayo cu no a hedge: Segun Francis Saladin di CUA, durante e encuentro gremionan a cuestiona si e forma di maneho cu a bin ta hibando desde comienzo di 2022. Tur hende sa cu ora di sali di pandemia, cu prijs di petroleo lo bolbe subi debi cu viahamento lo start bek, companianan tambe lo cuminza opera bek na capacidad completo, y por a mira prijs di crudo subi.
“Nan a haci bon trabao di hedging den 2021,” Francis Saladin a bisa. Pero toch no a tribi di haci den 2022. Algo a bay malo eynan. Nan tabatin tur e intencion di hedge atrobe pa 2022. Pero toch algun hende a faya di tuma e ‘decision final’.
“Manera nan mes a splica, cu esey tabata un oportunidad! Tabatin un momento cu a haya chens di haci hedging pa 2022,” Saladin a splica di loke nan a bin tende.
Saladin a bisa cu ta di compronde, pasobra nan mes no por a premira cu Rusia lo invadi Ucrania y start un guera. Pues e impacto di guera a pone prijs di crudo subi mas ainda. Pues e chens cu Aruba a haya pa hedge prijs di combustible HFO a bay perdi.
Pa colmo, prijs di combustible a subi mucho mas, y aki por deduci cu e isla a faya di drenta den un hedging pa por a spaar riba prijs di combustible.
E asunto di absorba costo: Ora cu prijs di crudo y di HFO a subi, WEB Aruba NV no a hisa tarifa di awa y coriente mesora. A resulta cu e compania mes a dicidi na ‘absorba’ e extra costo aki, door di usa su ‘reserva di placa’ pa paga pa e extra costo.
En corto, WEB Aruba NV a subsidia pueblo y comercio pa algun luna tur e extra costo aki. Pueblo a djis sigui paga e mesun tarifa.
WEB Aruba NV pues a alivia pueblo cu e prijs. Aki ta unda cu gremionan a cuestiona e maneho ey. Pasobra bo por absorba esey pa un rato, pero ora cu bo sa cu bo ta ‘comiendo’ den bo reservanan, un empresa di e magnitud y importancia pa pais, bo sa cu dado momento bo no por keda come demasiado di e reserva ey, como cu bo ta pone na peligro e stabilidad di awa y coriente pa pueblo.
Corda cu e no ta un empresa priva, cu si e doño kier hiba un mal maneho e ta bay bancarota y e empleadonan lo sufri su consecuencia. Pero aki ta trata di un empresa estatal unda henter e pais ta depende di dje.
Esaki ta algo cu Comerciantenan Uni Aruba tabata hopi preocupa cu e maneho ey, unda cu a tuma e decision di hibe te na e punto, cu hasta luna pasa na Juli ora cu WEB a anuncia cu mester hisa tarifa, Gobierno a spanta y a bolbe par’e aumento. Sinembargo gobernantenan sa cu esaki tin di socede.
Anto e ora ta warda te na ultimo druppel pa tuma un decision relampago pa hisa prijs cu porcentahe barbaro.
