Pueblo tin derecho di ricibi y comprende documentonan importante --- *Rapportnan di ARA ta veredicto di e forma cu ta gasta placa di pais --- *Prensa tin e tarea pa haci democracia realidad y presenta berdad
ORANJESTAD(AAN)—Kico ta berdad? Un pregunta cu no tin contesta, pero cu no por existi na un pais cu ta wordo goberna na forma democratico.
Segun democracia, Pueblo ta vota pa gobierno cu mester goberna na nomber di Pueblo, cu mester por comprende kico e Gobiermo ta haci y no ta depende di loke mundo politico kier presenta na Pueblo.
E sistema cu Aruba ta wordo goberna ta basa riba ley, cu ta exigi pa Pueblo por huzga pa su mes kico su gobernantenan ta haci y asina Pueblo cu conocemento di hechos por acudi na urna electoral pa vota pa politiconan cu e kier na mando.
E instancia cu mester vigila gobernacion na nomber di Pueblo y ta e prome yama pa defende bienestar di Pueblo, ta Parlamento cu ta representa Pueblo.
Ta sumamente dificil pa cada miembro di Parlamento riba su mes por reuni tur documento necesario y vigila si gobernacion ta actua a base di bienestar di Pueblo, cu ta cuminsa cu e forma cu politiconan ta gasta placa di Pueblo ora nan bira gobernantenan y ta encarga cu e maneho diario di e pais.
Ta pa e motibo aki, miembronan di Parlamento por conta cu sosten di un organo halto di gobernacion, cu ta Algemene Rekenkamer Aruba, cu ta un nomber cu por mira cu hopi frecuencia den nos publicacionnan.
35 aña pasa Aruba como pais a haya su propio Algemene Rekenkamer, su propio Polis di placa di Pueblo.
Prome cu introduccion di Algemene Rekenkamer Aruba, e trabou di vigila kico ta pasa cu placa di Pueblo, tabata den man di Algemene Rekenkamer Nederlandse Antillen den cual Aruba tambe tin representacion y cu tabata encarga cu control di e forma cu tabata gasta placa di Pueblo na Antia y na tur Teritorio Insular.
E colegio halto ta wordo forma pa ciudadanonan, cu ta controla si placa di Aruba ta wordo uza segun ley ta prescribi pero tambe cu e resultadonan necesario pa e pais y na forma cu ta sirbi e pais.
Un gobernante no por gasta placa di Pueblo sin sigui reglanan. E gobernante mester tene su mes na su mes na e cifranan cu a wordo aproba dor di mayoria den Parlamento.
Pa e Miembro di Parlamento por cumpli cu su trabou y sigur su Derecho di Budget, e mester di e asistencia di Algemene Rekenkamer Aruba, cu ta controla tur placa cu drenta y sali for di caha di Gobierno.
Algemene Rekenkamer Aruba por actua na momento cu e kier pa haci control cu e ta kere cu ta necesario.
Uno di e rapportnan mas conoci cu nos ta uza hopi pa splica e situacion actual di Aruba, ta e rapport “Bo Aruba” cu ta dicta catedra den maneho financiero di e pais.
Den e rapport “Bo Aruba”, Pueblo di Aruba pa medio di Parlamento ta wordo informa di e resultado cu un suma di 1.6 Biyon a wordo gasta dor di Gobierno Mike Eman sin e control debido di Parlamento.
Esaki a bira posibel pasobra e 1.6 Biyon no a wordo hinca den presupuesto dor di e mayoria di AVP den Parlamento cu a pone e suma di placa na disposicion di Gobierno Mike Eman.
Esaki a haci cu ni Parlamento di Aruba ni Hulanda por a controla debidamente e forma cu placa tabata wordo gasta manera lo a socede si e fondo aki, tabata inclui den e cifranan aproba como presupuesto.
Algemene Rekenkamer Aruba si por a actua a base di su posicion di “polis” di placa di Aruba, cu por start un investigacion independiente na e momento cu e kier of e ricibi un peticion pa haci esaki di Parlamento.
Esaki ta duna prueba di e importancia di Algemene Rekenkamer Aruba pa democracia na Aruba.
Ley ta describi e posicionnan den e colegio, cu ta wordo asisti den su trabou dor di trahadornan di e organo independiente cu no conoce color politico.
Siman pasa a yena vacaturanan cu tabata existi den e Colegio halto y pa nos sigur ta un momento pa para keto y splica comunidad cu e tin organo cu ta funciona como Polis di e forma cu placa di Pueblo ta wordo gasta.
Pa e circulo di democracia cera, prensa tin e deber moral di presenta informacionnan di Algemene Rekenkamer Aruba, vigilante di forma cu aparato gubernamental ta atende cu placa di Pueblo.
