E cara Hulandes nobo pa atende cu relacionnan den Reino --- *Aruba a cera conoci cu e politico di e partido social liberal --- *Tras di estilo moderno ta sconde experto den asunto financiero
ORANJESTAD(AAN)—“Orthodox” tabata e palabra cu Raymond Knops a uza como Ministro Hulandes encarga cu asuntonan den Reino.
Na momentonan cu rumbo di pais Aruba a wordo cambia riba tereno financiero, Raymond Knops mester a atende cu e herencia cu el a ricibi di Ronald Plasterk, un persona completamente diferente na Knops.
Awe atrobe Aruba a haya oportunidad pa realisa, cu politico ta hende y cu cada politico tin nan estilo. Cada epoca tambe ta produci su tipo di politico mescos cu e idealnan comun di partidonan politico cu ta dicidi pa acuerdo di gobernacion y rumbo di trabou politico den gobernacion.
Drs. Alexandra van Huffelen a presenta su mes na un forma cu por considera un biento fresco den e ambiente di negociacion cu Drs. Raymond Knops, cu realmente por considera un figura orthodox.
Na final di su careda, Knops a trata di demostra con e ta simplemente hende, pero den su actitud, Aruba sigur a haya e impresion cu e tabata e maestro para dilanti alumnonan cu e tabata instrui.
E tabata carece sigur e aspecto di Prof. Dr. Ronald Plasterk, cu a saca Mike Eman for di Fort Zoutman ora el a bini Aruba pa impone supervision.
Na momentonan importante pa futuro di Aruba, sigur mester a atende cu tres figura completamente diferente.
Cual tabata e problema mas grandi pa Aruba?
Realmente ningun a pusha Aruba sin mas contra e muraya cu por a pusha Aruba debi na e situacion cu Gobierno Mike Eman a crea pa Aruba.
E diferencia grandi entre Plasterk y Knops tabata, cu Plasterk tabata sa con yega caminda e kier bay na forma mas trankil mientras cu Knops no tabata tin e habilidad aki, manera na Hulanda tur hende lo admiti.
E partidonan na cual cada uno ta pertenece ta hunga un papel, pero ta un punto di bista Hulanda cu un gobernacion democratico a mantene.
Kico por spera awor di Alexandra van Huffelen cu un estilo cu realmente ta impresiona?
Mester tene na consideracion cu ta atende cu un profesional riba su tereno.
Su presentacion ta indica cu e ta un persona fuerte den su zapato y cu no ta wordo pusha contra muraya cu expresionnan cu por ta peligroso.
Fuerte ta e palabra cu sigur mester uza pa e gobernante Hulandes cu a atende uno di e casonan mas pisa cu Hulanda a conoce cu tabata e caso di e “toeslagenaffaire” den cual mester a haya solucion pa un cantidad grandi di Hulandes cu a wordo perhudica dor di mal trabou di belasting y hasta a wordo persigui dor di autoridad pa acto criminal.
Sin duda Aruba lo topa den su relacion cu otro paisnan di Reino, cu un gobernante femenino, cu ta un persona di su tempo cu su propio estilo.
Pero tras di e dama aki, tin un profesional. Un persona cu ta na haltura di e pasonan cu e mester tuma pa garantisa loke Statuut ta bisa, cu Aruba mester reforma su forma di goberna pa habri un epoca nobo di bienestar pa tur habitante di Aruba, cu a wordo perhudica cu e desastre financiero cu gobierno Mike Eman a laga atras.
