Tin trabou importante pa Parlamento enfrente desaroyonan mundial
*Prijs di gasolin ta sigui subi hunto cu menasa nobo pa economia
*Aruba mester cuida recuperacion financiero cu e pais a alcansa
ORANJESTAD(AAN)—Pakico un Gobierno huicioso no ta gasta placa pa loco pero mester hiba un maneho financiero responsabel, a resalta ayera ora prijs di petroleo riba mercado internacional, a dal e salto cu DIARIO pa basta dia ta adverti.
For di Diamars tabata tin tur indicacion cu e soño cu a wordo crea cu un caida di prijs di petroleo, por a conoce un final, pa cual DIARIO semper a adverti.
Prijs di petroleo ta wordo determina pa diferente factor. Stabilidad mundial riba tur tereno sigur ta uno di nan pero tambe e beneficio directo cu e paisnan productor di azeta kier alcansa cu nan mercancia, cu lo mester yega su final si sigui e proyeccionnan cu mundo a haci pa proteha naturalesa na mundo contra e peliger di entre otro petroleo.
DIARIO semper a mustra su lectornan riba e vueltanan cu tin den e negoshi di petroleo, cu a baha su prijsnan pa evita un recesion na 2023 a base di e forma cu tur prijs a subi mundialmente.’
Hunto cu prijs di petroleo, transportacion, produccion di awa y coriente, tur loke ta basico na un mundo cu ta depende di petroleo grandemente den su funcionamento, ta subi y baha.
Esaki ta motibo cu DIARIO ta vigila prijs di petroleo constantemente y e siman aki a bati alarma pa e aumento di prijs mundial di petroleo y consecuentemente e prijs di gasolin, cu ta wordo anuncia na forma separa y cu a conoce aumento tambe.
Kico esaki ta nifica pa Aruba, mester wordo mira awor den cuadro di e maneho financiero y economico di Gobierno di Aruba.
Situacionnan sumamente dificil por produci nan mes cu aumento di prijs di petroleo sigur na momento cu Aruba ta prepara pa e temporada di 2023 pa 2024 di turismo, cu a base di e esfuersonan grandi di tur sector na Aruba, a conoce un recuperacion historico.
Aumento di prijs di gasolin, mas ainda si tuma na consideracion medidanan cu diferente pais a cuminsa tuma pa loke ta trata conservacion di clima, semper ta un peliger pa economia mundial y economianan di paisnan manera Aruba cu ta depende pa su importacion y exportacion di exterior.
E hecho cu Gobierno Evelyn Wever-Croes a conduci Aruba na un recuperacion financiero y a sabi di crea resultadonan positivo pa e placa cu Aruba tin pa cubri su gastonan, awe ta bira e base cu mester wordo proteha pa Aruba enfrenta situacionnan mundial cu e situacion petrolero por crea.
Si Aruba a mantene un situacion di debe, awe e pais lo ta den un situacion sumamente serio.
Mester bolbe na e momento cu Gobierno Evelyn Wever-Croes a basa su mes riba aumento di entrada pa cubri gastonan pero tambe riba aumento di entrada cu no solamente ta basa riba medida, pero tambe riba entrada nobo garantisa pa mas entrada di economia di Aruba, cu a conoce adelanto enorme cu proyectonan nobo.
DIARIO awe ta bolbe duna constancia di e veracidad cu cual e ta informa Aruba, cu a wordo prepara pa e situacion mundial actual, cu ta resultado di e forma cu prijs di petroleo a pasa 90 Dollar y ta duna indicacion di lo sigui subi.
E aumento di prijs di petroleo y e prijsnan internacional cu awe a wordo presenta pa gasolin na nivel mundial, awor lo bira e base pa recibonan di awa y coriente por ehempel cu Pueblo lo paga na momento cu 2022 ta drenta su ultimo lunanan.
Sinembargo, mester tene cuenta cu e prijs cu a wordo fabrica dor di paisnan productor di petroleo pa evita recesion na 2023, ya pa basta dia a pasa pa historia y manera DIARIO a splica, lo afecta prijsnan cu ta wordo presenta na comunidad!
Informantenan experto di DIARIO a adverti tambe cu Parlamento di Aruba mester asumi su responsabilidad pa e pais y mester pone factornan di ganashi politico un banda pa asisti Aruba cu informacion veridico cu por yuda e comunidad Arubano den e situacion mundial cu ta desaroya.
