Hues a para medida di Gobierno di kita salario completo
ORANJESTAD (AAN): Corte di Husticia a dicta sentencia den e protesta di Alvin Howell contra e decision di Gobierno di 4 October 2022 di ademas di suspende Howell, kita durante 6 siman 1/3 parti di su salario y despues di e 6 siman, henter su salario como medida disciplinario.
Abogado mr. Canwood a representa Howell den e caso di protesta contra e decision di Gobierno. Tratamento di e caso aki a sosode na Maart 2023 y a tarda bastante promer cu sentencia di Hues den caso di empleado di Gobierno (LA) a cay.
EVALUACION DI HUES
Dialuna e sentencia a cay, caminda Hues ta bay hopi detaya riba e decision di Gobierno. Hues den su evaluacion ta mustra cu teniendo cuenta cu Howell a wordo condena den caso penal pa malversacion di placanan di Gobierno, falsificacion y forma parti di un organisacion criminal, Gobierno a haci uso di e autoridad cu e tin. Hues ta haya e medida di tene 1/3 parti di e salario di Howell na su lugar.
NO POR KITA SALARIO COMPLETO
Hues ta haya cu Gobierno no a tene debido cuenta cu e obligacionnan di pago cu e school di duna les di core auto y e compania di seguridad cu e señora di Howell tin. Pa e motibo ey Hues ta haya cu e medida di Gobierno pa kita e salario complete di Howell no ta na su lugar y ta declara esaki no admisibel.
GOBIERNO POR KITA 1/3 PARTI SO DI SALARIO
Hues su decision ta cu e ta honra parcial e protesta di Howell contra e decision di Gobierno, den sentido cu e parti di kita e salario completo ta wordo declara no admisibel. Hues a bisa cu Gobierno por kita 1/3 parti di e salario di Howell.
Manera ta conoci, Howell a apela e sentencia den caso penal. Esey ta haci cu te ora cu Corte Superior tuma un decision, lo bay haya sa kico e medida disciplinario lo bira contra Howell.
