ORANJESTAD (AAN) — Den e contraversia cu a surgi si personanan cu ta sospechoso of hasta ta deteni den un caso criminal por ta Miembro di Parlamento, DIARIO a asumi un posicion.
Semper DIARIO a puntra, kico lo a pasa cu un persona cu ta wordo sospecha di a comete un crimen si e tabata traha na un empresa priva. E contesta riba e pregunta aki tabata importante ya cu Parlamento ta un Organo halto di Estado y no por tin un midi mas abou cu un empresa.
Si Gobierno a cay y eleccionnan a tuma luga mas tempran cu tabata planea na 2021, tabata pasobra Alan Howell a bira sospechoso den un caso cu placa di un fondo di Parlamento a desaparece segun autoridad. Gobierno Wever-Croes a perde e mayoria necesario den Parlamento pasobra e no a sostene Howell como Miembro di Parlamento cu na su turno tabata sostene Gobierno.
Informacionnan cu DIARIO a ricibi ayera ta indica cu Alan Howell no por bolbe Cuerpo di Polis awor cu e no ta Miembro di Parlamento mas.
Howell tabata traha na Cuerpo di Polis prome cu el a bira Coordinador di Mike de Meza di AVP y despues a subi lista di POR y a drenta Parlamento.
Informacionnan ta indica cu e no bolbe traha como sospechoso den Cuerpo di Polis y cu hasta e por spera su retiro di Cuerpo di Polis.
E destino di Howell ta sumamente importante debi na e controversia cu a surgi despues cu AVP a lansa Benny Sevinger como candidato riba nan lista ora ya Husticia tabata atende cu Benny Sevinger como sospechoso.
Ta e decision di AVP cu Benny mester bay riba nan lista, a haci cu pa prome bez den historia Aruba tin un Miembro eligi den Parlamento cu ta den prizon y no por funciona como Miembro di Parlamento.
