Biento lo bay cay awe na Aruba
ORANJESTAD (AAN): Un Ola Tropical basta fuerte lo bay ta pasando riba Diaranson y Diahuebs den cercania di Islanan ABC. National Hurricane Center ta sospecha cu ora e drenta Lama Caribe, e ta bay tin chens grandemente di desaroya y haya aun mas forza.
Data cu nan ta dispone di dje, ta indica cu un circulacion amplio a wordo detecta Diamars merdia banda di 11.2º Nort y 58.8º West, cu ta como 185 km pariba di isla di Tobago. E Ola Tropical sinembargo ta wordo afecta pa bientonan fuerte na nivelnan halto di atmosfera. Sinembargo awe ora cu e drenta Lama Caribe, e lo por haya situacion mas faborable pa e converti su mes den un Depresion Tropical. E ta moviendo direccion west entre 18 pa 27 km/h.
Segun National Hurricane Center, condicion ta parce di ta mas faborable ora cu e yega den area central di Caribe, of parti west di Caribe.
No obstante esey, nan ta calcula cu awacero pisa lo por wordo sinti na islanan ABC, como tambe parti di costa panort di Venezuela, y costa noordoost di Colombia.
Pues awe Diaranson na Aruba, biento lo bay cay bastante y ta bira hopi calor. Lama tambe lo ta calmo. Pero ora cu awacero cuminza cay awetardi pa anochi, y sigui pa Diahuebs, tin di tene cuenta cu biento por ta fuerte e ora ey. Pa resto di siman tambe y weekend por keda spera mas awacero.
Riba e potret aki saca Diamars atardi 4:00 pm, por mira e parti grandi di e nubia di e Ola Tropical fuerte aki net ora e ta yegando Trinidad & Tobago.
