ORANJESTAD (AAN): Nan ta cla pa e asina yama “Big Live Nature Quiz - Edicion pa Mucha”. Pues ta yamando tur amante di naturalesa.
Dutch Caribbean Nature Alliance (DCNA) ta invita e scolnan basico y hoben entusiasma di naturalesa di Aruba, Bonaire, Curaçao, Saba, St. Eustatius, y St. Maarten pa join e Big Live Nature Quiz Gratis - Kids Edition diabierna, dia 1 di November 2024. E evento educativo y dibertido online aki ta duna e muchanan chens pa siña tocante naturalesa, mientras cu nan ta competi cu mucha di henter Caribe Hulandes.
E quiz ta diseña pa inspira y educa mucha tocante e ecosistemanan unico di Caribe Hulandes bao di e tema “Nature’s Locals, New Comers, and Intruders”. Mucha lo descubri hechonan fascinante tocante e especienan nativo, no-nativo y invasivo, mientras cu nan ta siña con pa proteha e medio ambiente di nan isla a traves di preguntanan interactivo.
Un Berdadero Prestacion di Team: E iniciativa aki ta un colaboracion entre tur seis isla di Caribe Hulandes y e partnernan di conservacion di DCNA: Aruba Conservation Foundation, Carmabi, Stinapa, Saba Conservation Foundation, St. Eustatius National Parks Foundation (Stenapa), y Nature Foundation Sint Maarten.
E esfuerso aki a logra danki na participacion di e scolnan basico local, Dutch Caribbean TV y sosten financiero di Ministerio di Agricultura, Pesca y Naturalesa, y Nationale Postcode Loterij.
E quiz ta Diabierna 1 di November 2024 y ta for di 8:30 am te cu 9:15 am.
E ta habri pa muchanan di klas 5 y 6 (sistema Hulandes: “groep 7 y 8”). Team di te 4 mucha of participante individual. E scolnan por inscribi varios team. Registracion ta necesario! E docentenan mester registra nan team via BigLiveNatureQuiz.org
E quiz lo consisti di pregunta di escohencia multiple basa riba e revista BioNews Kids di DCNA (edicion di aña 2024). No ta rekeri preparacion, pero lesamento di e revista por yuda! E scolnan participante lo ricibi copia imprimi di BioNews Kids prome cu e quiz, y e ta disponibel tambe online na Ingles, Hulandes, Papiamentu y Papiamento.
Premionan exitante: E team ganado lo disfruta di un trip riba barco di bela y di snorkel cu nan docente, y tin set di snorkel cu por gana. No Perde, pues inscribi awe mes. DIARIO a compronde cu participacion ta gratis, pero inscripcion ta necesario. E maestronan por registra nan teamnan di klas online na e mesun website di BigLiveNatureQuiz.org
