ORANJESTAD (AAN): Riba 24 september 2022 e Facultad di Ley di Universidad di Aruba lo habri su portanan di e Tienda di Ley.
E prome citanan lo bay tuma lugar e mesun dia aki di 9 am pa 11am.
Loke Tienda di Ley ta haci: E Tienda di Ley lo yuda personanan cu tin problema legal y cu no tin e placa of suficiente placa pa paga un experto legal. Esaki ta sosode door di traha un advies (conseho) tocante e problemanan aki.
E Tienda di Ley por duna conseho tocante preguntanan legal di labor, huur, daño, contractnan, areglonan di pago, divorcio, inmigracion y cu yenamento di formulario legal.
Si tin un problema legal cu e Tienda di Ley no por handel, e persona lo haya un carta pa bay na un otro instancia concerni. E Tienda di Ley ta duna conseho solamente y no ta defende personanan den procedura legal.
Asina e Tienda di Ley ta funciona: Studiantenan di e Facultad di Ley lo yuda personanan den e Tienda di Ley. Durante e cita, dos studiante lo bay yuda bo persona cu e problema legal y bo persona lo mester splica e studiantenan tocante e problema aki.
Despues e studiantenan y nan guia lo planea con nan ta bay handel e caso aki pa bo persona. E studiantenan lo haci un onderzoek pa soluciona e problema legal y pa contesta e preguntanan haci door di bo persona. Despues bo persona lo haya un conseho legal di e studiantenan.
Con pa inscribi bo caso na e Tienda di Ley: Universidad di Aruba ta organiza e Tienda di Ley. E Tienda di Ley ta habri riba e siguiente dianan: Diasabra 24 di September, di 9:00 am pa 11:00 am. Diasabra 8 di October di 9:00 am pa 11:00 am. Diasabra 29 October di 9:00 am pa 11:00 am.
Diasabra 26 di November for di 9:00 am pa 11:00 am. Diasabra 3 di December for di 9:00 am pa 11:00 am. Diasabra 14 Januari for di 9:00 am pa 11:00 am. Diasabra 29 Januari for di 9:00 am pa 11:00 am.
Pa por yuda bo persona cu e caso, bo persona lo mester di un cita. Pa por haci un cita por bay riba e Facebook-pagina Tienda di Ley of por haci esaki via e e-mail: This email address is being protected from spambots. You need JavaScript enabled to view it.. Riba e pagina di Facebook lo por haya un formulario pa inscribi e caso of por manda e formulario pa inscribi e caso tambe via e-mail.
Tambe bo persona tin e opcion pa pasa na e Universidad di Aruba durante e dia y ora cu e Tienda di Ley ta habri pa busca un formulario pa inscribi e caso. E Tienda di Ley no tin un number di telefon.
