Cultura tambe ta den enfoke di CreActivo
ORANJESTAD (AAN): Marc’e den bo calender pa dia 8 y 9 di October 2024, caminda Renaissance Convention Center lo bira e epicentro di cultura, creatividad y innovacion cu CreActivo!
E prome conferencia innovativo di Aruba dedica na e industrianan cultural y creativo. Esaki ta un evento di dos dia, cu ta cuminsa for di 9:00 am pa 4:00 pm cada dia. CreActivo ta un centro vibrante di ideanan, networking y colaboracion pa artistanan y sernan creativo, local y internacional.
Un Plataforma Global pa Mentenan Creativo - Conferencia CreActivo ta un plataforma poderoso unda artistanan, diseñadornan, escritornan, musiconan, performers, cineastanan, creadornan digital, educadornan y tur esnan creativo y innovativo por uni pa comparti nan trabao, amplia nan horizonte y construi conexionnan di hopi balor.
Pero e conferencia aki no ta solamente pa esnan cu ta na e frontera creativo, alavez esnan cu ta traha maneho, esnan cu ta tuma decision, institutonan financiero y gremionan clave tambe ta hunga un rol crucial, pa asina sigura cu e bosnan cu ta forma e sector cultural y creativo por worde scucha y apoya. Stimulando asina un ecosistema creativo vibrante.
Oradornan Diversifica - CreActivo lo tin un elenco impresionante di oradornan local y internacional cu ta lidernan den nan area. Expertonan cu lo comparti nan conocemento, experiencia y vision pa futuro. Tambe lo comparti perspectivanan valioso en conexion cu cultura, creatividad, innovacion y crecemento sostenibel di e industrianan cultural y creativo. Mas detaye tocante nos oradornan lo ta disponibel pronto riba nos website y paginanan social.
Pakico Asisti: CreActivo ta mas cu un conferencia - e ta un movimento! Un lugar unda profesionalnan estableci y talentonan emergente por uni pa explora oportunidadnan nobo, influencia maneho y desaroyo, obtene apoyo financiero y construi colaboracionnan cu ta transcende e fronteranan tradicional. No ta importa si bo ta un profesional cu hopi experencia of cu awo bo ta cuminsando den e industria creativo. CreActivo ta ofrece algo di gran balor: e oportunidad pa forma parti di un comunidad dedica na cultiva creatividad y desaroya un industria di forma sostenibel.
Loke por spera: Participantenan di CreActivo lo disfruta di dos dia completo di sesionnan interesante, un ticket ta inclui desayuno, lunch y acceso na e coffee station ful dia. E evento tambe ta priminti experiencianan creativo unico, permitiendo participantenan pa drenta den actividadnan interactivo cu ta refleha e naturaleza diversifica di e industrianan cultural y creativo.
Uni Bo Mes na e Movemento: CreActivo ta comprometi na stimula un ambiente inclusivo unda cada bos lo worde scucha. Esaki ta e oportunidad pa uni bo mes na un comunidad diversifica cu ta cubri tur faceta di e industrianan cultural y creativo. No perde bo chens pa crea influencia riba e futuro di e industrianan aki, registra na tempo y forma parti di e evento principal cu ta uni profesionalnan creativo y gremionan mundial! Mas detaye di ticket y registracion lo sali pronto.
