Ministro Geoffrey Wever:
ORANJESTAD (AAN): Siman pasa durante tratamento den Parlamento, Minister di Finansa, Asunto Economico y Sector Primario, Geoffrey Wever, a enfoca atencion riba importancia di Algemeen Investerings- en Ontwikkelingsfonds (AIOF), como un instrumento legal y financiero cu ta permiti Pais Aruba planifica, financia y ehecuta inversionnan publico riba varios aña den un manera mas structura, responsabel y transparente.
AIOF a wordo crea specificamente como un fondo presupuestario pa inversionnan di Pais Aruba. Landsverordening Algemeen Investerings- en Ontwikkelingsfonds a wordo establece dia 9 di juli 2026 y ta publica oficialmente como AB 2026 no. 16. E ley ta crea e base legal pa un fondo cu tin como meta financia inversionnan publico na beneficio di bienestar y desaroyo di Aruba.
Loke ta AIOF: E asina yama AIOF ta, den esencia, un instrumento cu ta permiti Gobierno planifica inversionnan riba un periodo mas largo cu un solo aña presupuestario. Proyectonan publico grandi no semper por wordo prepara, licita y ehecuta dentro di diesdos luna. Un proyecto por pasa door di estudio, diseño, preparacion tecnico, evaluacion, licitacion y finalmente ehecucion. Cada un di e fasenan aki ta tuma tempo.
Segun Minister Wever, precisamente p'esey Aruba mester un instrumento cu ta alinia e manera di financia inversion publico cu e realidad di ehecucion di proyecto.
“AIOF no ta simplemente un fondo di placa. E ta un sistema cu ta permiti Pais Aruba planifica inversionnan publico riba varios aña, prepara nan miho y conecta financiamento cu ehecucion y resultado.”
E recursonan di AIOF por bini for di Presupuesto di Pais Aruba y e fondo por ricibi tambe contribucionnan di tercer partidonan, manera Hulanda y Union Europeo. AIOF ta conecta cu un Agenda di Inversion Multianual, cu ta crea e marco pa Gobierno planifica inversionnan riba termino largo y organiza nan den un manera mas coherente.
E Agenda di Inversion por inclui inversionnan den areanan manera renobacion urbano, enseñanza, transicion di energia, resiliencia climatico, vivienda duradero, infrastructura y desaroyo di sectornan economico nobo, entre otro agricultura comercial, FinTech, industria creativo y economia blauw.
AIOF tin su propio presupuesto, cu ta contene entrada, gastonan y obligacionnan financiero. E presupuesto di e fondo ta wordo agrega como un parti separa den Presupuesto di Pais Aruba, mientras e cuenta anual di AIOF ta wordo consolida cu cuenta anual di Pais Aruba.
Pa Minister Wever, e distincion aki ta importante. AIOF no ta un fondo cu ta funciona pafor di e sistema presupuestario, sino precisamente un instrumento cu ta incorpora inversionnan a largo plazo deni un structura financiero formal.
“Bon maneho financiero no ta encera solamente tene cifranan na ordo. E meta final ta pa crea e condicionnan pa Pais Aruba por inverti responsablemente den su futuro. Y ora nos ta haci uso di placa publico pa haci inversion, e inversion mester tin planificacion, control debido y rendicion di cuenta,” Minister Wever a destaca.
Un otro elemento importante di AIOF ta evaluacion di proyectonan. Cada ministerio por presenta proyectonan di inversion. E proyectonan por wordo evalua pa Comision di Evaluacion di Inversionnan, cu ya desde 2022 ta encarga cu evaluacion di proyectonan di inversion di Pais Aruba.
E comision ta duna Gobierno conseho tocante proyectonan, alocacion di recursonan y con cada proyecto ta alinia cu maneho di Gobierno. Den e evaluacion por wordo considera, entre otro, efectividad, sostenibilidad, ehecutabilidad, direccion y control. Tambe por pidi aporte di otro expertonan dependiendo di e naturaleza di e proyecto.
Minister Wever ta enfatisa cu disponibilidad di placa no por ta e unico criterio.
“Bon inversion no ta cuminsa cu gasta placa. E ta cuminsa cu prepara un proyecto bon. Nos mester sa cua necesidad e proyecto ta atende, si e ta ehecutabel, cuanto e ta costa y cua resultado e mester entrega pa comunidad.”
Administracion di AIOF ta cay bou Departamento di Finansa, mientras Centrale Accountantsdienst tin un rol den control riba e administracion di e fondo. Minister di Finansa mester entrega cada mitar di aña un resumen di entrada y gastonan realisa, y CAft ta ricibi copia di e informacion aki.
Ademas, Comision di Evaluacion di Inversionnan mester entrega anualmente un resumen di su actividadnan, incluyendo proyectonan di inversion aproba, cambio den recursonan, gastonan destina na proyectonan y resultadonan di e proyectonan. Despues di cinco aña, e ley ta exigi un evaluacion di efectividad y efecto di e Landsverordening AIOF, cu mester wordo entrega na Parlamento y CAft y publica publicamente.
E ley ta conserva tambe rol constitucional di Parlamento den aprobacion di recursonan publico y den rendicion di cuenta tocante ehecucion di e fondo.
Segun Minister Wever, e balor berdadero di AIOF lo wordo determina finalmente pa calidad di proyectonan y resultado cu e inversionnan ta entrega.
“E fondo no ta e meta final. E inversion y e resultado pa Aruba ta e meta. Cu AIOF nos ta crea un structura pa planifica miho, evalua miho, financia miho y sigui inversionnan publico te na resultado.”
Cu AIOF, Pais Aruba tin un instrumento financiero ancra den ley y conecta cu un vision multianual. Esaki ta crea un base pa atende necesidadnan di awe, mientras Aruba ta planifica y prepara inversionnan cu mester contribui na su desaroyo den futuro.
