Opinion publico: --- ORANJESTAD (AAN) – Desde prome cu e pandemia pero agrava pa e pandemia, e situacion di tardanza pa haya cita cu specialistanan ainda ta un problema sin solucion.
Tin pashentnan cu ta wardando pa dos aña largo pa un cita cu docter di wowo, incluso personanan cu pa motibo di malesanan serio cu a pasa aden, haci test di wowo regularmente, ta un mester. No obstante, nan ta riba lista di spera pa tempo largo.
Tin pashentnan cu a entrega na verwijsbrief pa un prome test y wardando e cita cu e specialista mes, e carta di garantia aki a caduca, y nan tin cu warda te ora nan wordo yama pa bolbe pidi docter esaki, cu solamente ta dura 3 luna y no 6 manera den pasado. Y cu temor cu diripiente AZV bisa cu e pashent mes tin cu paga e consulta, manera e cosnan ta, nada di straño tin.
Tin pashentnan cu a wordo opera di stoma, por ehemplo, cu ya caba ta wardando casi tres aña pa consulta cu e specialista. Consulta di control cu mester a haci alomenos cada seis luna!
Otro ciudadano a comenta tocante e situacion aki a expresa cu el a opera di cancer di tripa, pero e no sa con e ta paden. E ta tumando remedinan natural, y claro confiando den Dios cu tur cos ta bon, pasobra e no a haya mas un CT-Scan, ni ningun otro tipo di test pa wak con su stoma ta paden.
Tin docternan cu ta nenga di pidi cierto testnan di laboratorio, pasobra AZV a bisa nan cu mester limita nan, pero ora e pashent bay di su mes cuenta e laboratorio ta haci e test si, pero e no ta duna e cliente (CU A PAGA) e resultado, sino cu ta mande pa su docter di cas y e pashent tin cu keda warda te ora e docter tin chens pa bise con e test a sali.
Y asina tin diferente keho riba tereno di salud, cu hopi asegurado ta malcontento cu e servicio y nan ta puntra pakico no bolbe na e sistema di antes, cu tur hende por a cera un aseguro di salud priva.
E situacion financiero di AZV no ta bon y tin hopi restriccion pa loke ta cuido di salud, pero alavez AZV ta sigui monopoliza e tereno di salud y e asegurado no tin mas opcion. Asina DIARIO a compila varios reclamo cu tin den nos comunidad, encuanto cuido medico na Aruba.
