ORANJESTAD (AAN): Aruba ta canando dilanti di otro islanan den Caribe y Aruba ta un di e destinonan cu ta hayando demanda mas halto,
asina CEO di Oficina di Turismo, Ronella Croes a indica.
El a agrega cu e no ta compara Aruba cu Republica Dominicana pasobra eynan ta papiando di cantidad di bishitantenan hopi mas grandi cu Aruba. Republica Dominicana ta mas grandi y tin mas hotelnan pa yena.
Aruba ta canando dilanti porcentualmente den demanda compara cu otro destinonan. Esey ta e datonan cu ta haya basicamente for di aerolineanan y tour operadornan cu ta bende Aruba, a bisa.
Ora cu ta puntra kico ta e factornan cu ta haci Aruba diferente, un di e puntonan principal ta e punto di e strategia di comunicacion den diferente mercado, pero tambe e hecho cu e turistanan ta sinti sigur.
Esey ta indica tambe cu mayoria di e bishitantenan por conclui cu sa kico ta e experiencianan cu nan por spera na Aruba, con Aruba ta maneha e virus, kico ta e rekisitonan y tambe e hecho cu ta pone nan sinti nan sigur, Croes a enfatisa.
Por ehempel, Republica Dominicana no ta exigi ningun test ora di drenta. Nan a hacie pa un momento y despues nan a kit'e. Aworaki bo ta simplemente drenta sin cu mester di haci test.
Aruba tin e rekisito ey ainda y por argumenta cu kisas esey ta duna e bishitante un tiki mas confiansa mientras cu ta sigui flexibilisa y mientras cu ohala pronto por anuncia cu mesun cos cu a anuncia pa localnan cu ta full vacuna, cu turistanan cu ta completamente vacuna no mester test of presenta un resultado negativo di test ora di drenta Aruba, Ronella Croes a indica.
