Jayburtt Dijkhoff, director SIKI:
*Manera dicho na Spaño ta bisa: “Juntos pero no revueltos!”
ORANJESTAD (AAN) – Den conferencia di prensa, relaciona cu e curso “Con pa goberna un pais”, cu Dr. Jayburtt Dijkhoff a lanza, el a agrega cu dentro di e ultimo cuarenta añanan, tabata tin y tin ainda, un desconfianza entre e partidonan politico pero tambe entre e propio minister y ministerionan den tur Gabinete, cu ta haci cu enberdad nos tin un gobierno, pero manera tin un dicho na Spaño ta bisa “juntos pero no revueltos”, kiermen “hunto pero no uni”.
“Hunto como Gobierno ta un palabra, pero hopi biaha ta haci cu cada ministerio ta un isla riba su mes. Kico esey tin como consecuencia? No tin un maneho integro y hopi biaha e vision ta keda cada cuater aña. E tabata desastroso pa nos pais den casi cuater decada cu a pasa, y e investigacion cu nos a haci ta mustra esey tambe. Cu nos a yega un punto, cu nos tin cu cambia e manera di pensa, y e manera di traha ey”, Jayburtt Dijkhoff a remarca.
El a agrega cu esaki tin tres punto di relevancia pa Aruba. “E prome ta cu autonomia di nos pais ta na peligro. E investigacion aki, den e curso aki, basicamente nos kier bay wak cu ya nos ta bao curatela, cu ta yama ‘Landspakket’ pasobra si pais Aruba lo a traha na un manera uni. Manera cu e principionan di nos democracia y Estado di Derecho ta bisa, nos lo tabata tin reserva suficiente pa por a wanta un crisis. Pero rapport tras di rapport ta bisa cu no ta di awor, gobierno di Aruba ta haci algo pasobra nos economia ta debil, y vulnerabel.
Tin hopi cos cu por wordo haci, pero e primacia di politica, a haci cu na dado momento, e sistema a bay for di balansa. Y si nos sigui asina aki, basicamente nos autonomia ta bay perde su forza y na un dado momento, mi no ta descarta e posibilidad cu nos lo ta bay end up mescos cu DES, pero den otro nomber. E contenido di nos economia ta bay keda bay atras!” Dr. Jayburtt Dijkhoff a subraya.
