Cindy Peña, coordinador evento na IBiSA:
*Dialuna ta cuminza, asina cu mester pura pa inscribi y paga
ORANJESTAD (AAN)—Candy Peña, Coordinadora di Evento di IBiSA, den entrevista cu Matutino DIARIO a informa cu tin algun lugar mas pa nan “Youth Adventure Camp”. IBiSA ta casi cla cu e preparacion y tur lugar cu nan tin den e programa, a confirma nan participacion y e muchanan ta inscribiendo caba.
E parti logistic y tur otro aspecto mester ta cla pa otro siman, Dialuna.
Candy a reitera cu tin tiki lugar disponible so, asina cu mester pura yega na IBiSA entre 8’or di mainta pa 12’or di merdia, y di 1’or pa 4’or di atardi pa haci e pago y inscribi e mucha.
Peña no a duna mucho detaye tocante e programa di actividadnan pasobra nan intencion ta pa e muchanan yega experimenta, no obstante el a bisa cu ta bay tin Hiking, lo bay Mariniers Kazerne, y na Palm Island, y un par di sorpresa mas cu nan tin.
E camp ta bay mas tanto pa e parti di aventura, y lo tin actividad dentro di cada actividad, segun Candy Peña a menciona.
E campamento ta cuminza Dialuna 13 te cu Diabiena 17 di October awo. Cada dia lo tin actividadnan nobo y diferente.
Muchanan mester ta na Linear Park, Plaza Turismo, mainta entre 7.30’or cu 8’or. Y di aki nan ta sali bay tur e camindanan destina. Eynan e mayornan ta trece e muchanan y ta busca nan tambe. Tin un excepcion Diamars, pero IBiSA ta informa e mayornan na unda nan busca nan yiunan.
Tur e detayenan di campamento mayornan ta haya via email, ora di baha, ora di busca, etc. Den e tempo aki cu tin hopi calor, ta bon pa nan cana cu nan boter di awa, pa nan ta hidrata. Anto no bin cu cosnan di balor, pasobra e Camp no ta para responsabel pa cualkier cos di balor cu nan por trece.
Tambe tur dia e muchanan mester trece paña extra, pasobra e muchanan ta yega bunita bisti, pero nan no sa con ta bay caba despues di merdia. Entre 12’or pa 12.30’or mayornan por busca nan muchanan na Plaza Turismo mes.
