Segun señora Jessica Irausquin di SKOA:
ORANJESTAD (AAN) Desde 2025, Minister di Enseñansa Gerlien Croes a introduci un maneho nobo pa mantene e maximo di mucha den klas na 24. Tur prome aña di kleuter, prome aña di scol basico y prome aña di scol avansa ta cuminsa e aña cu un klas di 24 alumno. Segun loke Hefe di Recurso Humano y Directora suplente di SKOA, señora Jessica Irausquin a splica den un entrevista cu DIARIO, lo por tin situacionnan unda mester sobrepasa e cantidad aki.
El a declara cu actualmente tin algun vacatura habri pa docente pa scolnan basico. Pero e situacion no ta asina alarmante cu tin mester mas di 10 docente. Pa kleuter tambe tin un of dos vacutura.
Segun e, e cantidad di scol cu tin actualmente y e manera di maneho ta stabil pa loke ta trata e scolnan cu tin na Aruba y no ta rekeri construccion di scolnan nobo. Pero, el a remarca, mester semper keda monitoria e movicionnan di afo cu por causa bahada di alumnonan of lo keda stabil pero lo no tin subida. Ta depende tambe, el a remarca, na e cantidad di mucha cu ta nace pa aña.
Señora Irausquin a indica cu barionan na unda ainda tin scolnan cu algun cupo habri ta San Nicolas, Santa Cruz, y na Noord. Inscripcionnan ta bayendo bon. Kleuter ta na 91 porciento yen. Scolnan Basico y Avansa tur ta yena cu mas di 90 porciento.
Pa loke ta trata pago escolar, SKOA ta recomenda tur mayor cu no por paga esaki, pa busca ayudo na fundacionnan. Momento cu acerca SKOA, mayornan ta haya conseho cua fundacion nan por acerca.
Inscripcion pa scolnan di SKOA ta habri y ta keda habri te cu prome cu scol habri bek y tanten cu tin cupo. Mas informacion tocante incripcion, pago y proceduranan por ser haya riba e paginanan social oficial di SKOA of na oficina di SKOA mes.
