ORANJESTAD (AAN): Manera DIARIO a trece dilanti caba, GLW Foundation ta organizando pa di 9 aña consecutivo su benta di cupcake “Cupcake di Speranza”.
Manera ya a bira un tradicion, GLW Foundation organizador di Miss Teen Aruba International y Turismo Mundial ta organiza e di 9 edicion di su popular “Cupcake di Speranza”. E aña aki nan ta dedica e benta na Baby Jeremiah y Famia Rasmijn.
Baby Jeremiah: E ta un baby di apenas 3 luna cu mester a worde hiba Colombia pa asina haya tratamento pa salba su bida. E baby aki a nace cu “Tratalogia di Fallot” y ta den exterior pa su salud, na Colombia nan a bin saca afo cu Baby Jeremias a nace cu 2 aorta y esey ta haci e fluho di sanger complica, ademas un banda di su pulmon a collapse y nan a pone un stent pa mantene funcional.
Diabierna 9 di Februari, Baby Jeremias ta cumpli 3 luna y docternan lo evalue pa asina mira e posibilidad pa haci un operacion. Famianan mester mas fondo pa caba di paga full su tratamento.
Famia Rasmijn: Nan a perde tur cos na nan cas cu a kima cerca di rotonde Santa Cruz na final di aña 2023 tambe lo haya nos ayudo. E pareha ya caba di edad a ricibi basta quemadura pero danki Dios nan ta cu bida y nos lo kier yudanan cu loke nos por.
Pesey mes GLW Foundation cu su lema semper “Mas cu un certamen di beyeza” lo ta organizando e Cupcake di Speranza pa dianan 13 y 14 di February 2024.
Aki ta unda companianan y tambe individualnan por bestel cupcake den e forma simbolico di 5 Florin pa Cupcake y di e forma aki tambe yuda cu e bon causa aki. Minimo pa order ta 10 Cupcake y por bestel cuanto cu ta desea.
Pa bestelling por manda un WhatsApp of yama na 561-6151 y haci bo pedido.
Na nomber di famia di Baby Jeremiah y tambe Famia Rasmijn, henter famia y e organizacion di GLW Foundation, palabranan di masha danki. Tambe bo por haci un donacion si ta desea esaki na e cuenta di banco (por comunica cu nos pa mas detaye con abo tambe por yuda).
E team di repartidornan lo parti e cupcake nan aki dianan 13 y 14 di Februari tanto na cas y tambe na companianan.
