President Marlon Sneek di Parlamento:
ORANJESTAD (AAN) Manera ta conoci, e prome “Interparlementair Koninkrijsoverleg” (IPKO), pa aña 2026, a tuma lugar siman pasa na Aruba, y awo cu IPKO a finaliza, Presidente di Parlamento, señor Marlon Sneek, den entrevista cu Matutino DIARIO, a splica un tiki tocante e temanan cu a wordo discuti.
Señor Marlon Sneek a declara cu tin temanan cu e parlamentarionan a keda cu nan riba agenda. El a comenta cu e discusion, un par di aña atras tabata riba finanzas y tur tipo di rijkswet cu tabata tin, y den e presentacion, e biaha aki, pa un rato a trece un bista riba e desaroyonan con e finanzas aki a sigui cana.
Presidente di Parlamento a indica cu tabata tin diferente tema di discusion riba envehecemento, cuido di adulto mayor, cu no ta solamente na Aruba, pero ta temanan cu tambe ta tumando lugar na e demas Islanan di Reino y na Hulanda, y Aruba a dirigi e temanan aki.
Tambe tabata tin temanan manera enseñanza y nan a purba keda riba topiconan cu cada bez ta biba den Reino.
Presidente di Parlamento a bisa cu e siguiente reunion di IPKO ta bin na cuminzamento di Juni, pa bin cu temanan nobo tambe y temanan cu tabata suficientemente discuti.
E biaha aki tambe a bin un tema nobo cu tabata “conectividad’ den Reino. Segun Sneek, Hulanda a mir’e mas pa e parti di Bonaire, Saba y St. Statius, cu e ta responsabel pa nan, pero Aruba tambe a wak’e den su totalidad. Manera nos tur sa un biahe pa Bonaire of Curacao, tin biaha ta mas caro cu un biahe pa Colombia, of Miami mes. E tipo di temanan aki tambe a forma parti di e discusionnan cu tabata tin.
